6 август куни тонгда Тожикистоннинг Қирғизистон билан чегара ҳудуди Исфахон участкасида икки давлат фуқаролари ўртасида жанжал содир бўлди. Можарога нима сабаб бўлгани ва унинг тафсилотлари маълум эмас, деб ёзмоқда Asia Plus.
Қирғизистоннинг «Кўктош» чегара қўшинлари гуруҳи бошлиғи, лейтенант Шер Кабиров қарама-қарши томондан номаълум шахс ов милтиғидан узган ўқдан яраланган. Бу ҳақда Тожикистон миллий хавфсизлик давлат қўмитаси чегара қўшинлари ахборот хизмати маълум қилган.
Ҳодиса жойига яқин ҳудудда Тожикистон фуқароси 65 ёшли Воҳид Ваҳобовнинг жасади топилган, у ўқ еб вафот этган. Эркак Исфарадаги Чоркух қишлоғида яшаган, дейилади хабарда. Ҳодиса юзасидан бошқа тафсилотлар ошкор этилмаган.
Хабарда қайд этилишича воқеа жойида қўшма комиссия аъзолари иш олиб бормоқда ва унга иккала давлатдан махсус вакиллар чақирилган. Вазият назорат остида, дея ҳодисага изоҳ берган Тожикистон чегара хизмати.
Қирғизистон чегара хизмати ахборотида лейтенантнинг яралангани айтилган, бироқ тожикистонлик эркакнинг ўлими юзасидан изоҳ берилмаган. «24.kg» ахборот агентлигининг Қирғизистон чегара хизматига таяниб, берган хабарига кўра қуролли тўқнашув Боткен туманидаги Оқ-Тош қишлоғи яқинида содир бўлган.
«Тожикистон томонидаги номаълум шахслар қирғизистонлик ҳарбийга қарата ов милтиғидан ўқ узган. Ўқ ҳарбийнинг қўлини тешиб ўтган. Унга тезкор тиббий ёрдам кўрсатилган. Яраланган ҳарбийнинг аҳволи қониқарли деб баҳоланмоқда», — дея агентликка қўшимча маълумот берган ва айни вақтда икки мамлакат вакиллари чегарадаги вазият юзасидан учрашув ўтказилаётганини қўшимча қилган Қирғизистон чегара хизмати.
Қирғизистон ва Тожикистон чегарасида бу каби можаролар ўтган йилнинг ёзидан бери тез-тез такрорланиб туради. 2019 йилнинг июнь ойида тожик-қирғиз чегарасида келишмовчилик юз бериб, қирғизистонликлар 45 километрли автойўлни таъмирлаш ишларига қарши чиққан. Сентябрь ойида эса Қирғизистон—Тожикистон чегарасида юз берган отишмада қирғиз ҳарбий хизматчиси ҳалок бўлган. 2020 йилнинг ўзида бу сафарги жанжал чегарада икки миллат вакиллари ўртасидаги тўқнашувга олиб келган иккинчи вазиятдир, аввал 9 январда ҳам аввалига фуқаролар ўртасида бошланган жанжалга кейинчалик ҳуқуқ-тартибот органлари ходимлари ва чегарачилар ҳам қўшилган.
2020 йил май ойи бошида Тожикистон чегара ҳудудида қирғиз ва тожик ҳарбийлари ўртасида низоли вазият содир бўлган, тўқнашув оқибатида Тожикистоннинг икки нафар фуқароси яраланганди. Кейинчалик май ойи охирида икки давлат ҳарбийлари ўртасида яна тўқнашув содир бўлган. Икки мамлакатнинг чегара қўшинларининг идоралари ушбу ҳолат юзасидан музокаралар олиб бораётгани хабар қилинганди.
Изоҳ (0)