Tesla ва SpaceX асосчиси Илон Маск Мисрдаги пирамидалар номаълум цивилизация томонидан қурилгани тўғрисидаги назарияни қўллаб-қувватлади. «Пирамидаларни ўзга сайёраликлар қурган, бу очиқ-ойдин-ку», — деб ёзган Маск ўзининг Twitter’даги саҳифасига.
Шунингдек, Tesla асосчиси қадимги Миср фиръавни Рамзес II қаттиққўл бўлганига шама қилган.
Тадбиркорга Миср халқаро алоқалар вазири Рания ал-Машат жавоб қайтарган. У пирамидаларга ўзга сайёраликларнинг алоқаси бор ёки йўқлигини тўғридан-тўғри инкор этмаган. Бунинг ўрнига вазир Маскни Мисрга келиб, пирамидалар қурилишига оид маълумотларни ўрганиш, шунингдек, пирамида қурувчиларининг қабрини текширишга таклиф этган.
Мисрлик археолог Захи Ҳавас эса Маскнинг ўзга сайёраликлар борасидаги гап-сўзини «алаҳсираш» деб атаган. «Мен пирамидаларни қурган қурувчиларнинг қабрларини топганман ва бу пирамидани мисрликлар қурганидан далолат беради ҳамда улар қул бўлмаган», — дейди археолог.
Шундан сўнг Маск пирамидаларнинг қурилиши «мулоҳазали» тушунтириб берилган BBC материали ҳаволаси билан бўлишган. Ушбу материалда бошқа нарсалар қатори, пирамида қурувчиларининг қолдиқларини ўрганишда ўзга сайёраликларнинг излари топилмагани айтилади.
Эслатиб ўтамиз, 2019 йилнинг сентябрида Илон Маск тўлиқ йиғилган илк Starship ракетаси тақдимотида галактикада ўзга сайёраликлар мавжуд эмаслигини маълум қилганди.
Изоҳ (0)