«Бухородонмаҳсулотлари» АЖга қарашли Вобкент туманидаги дон қабул қилиш маскани омборидан 27 минг 560 килограмм буғдойни талон-торож қилган мудирнинг жинояти фош этилди. Бу ҳақда «Дарё»га Бош прокуратура ҳузуридаги Иқтисодий жиноятларга қарши курашиш департаменти вилоят бошқармаси ахборот хизмати хабар берди.
Таъкидланишича, омбор мудирининг кирдикори 2020 йилнинг 27 июль куни пандемия шароитида ажратилган ун ҳамда нон маҳсулотларининг нарх-навосини назорат қилиш юзасидан ўтказилган тадбирда фош этилган.
Маълум бўлишича, Вобкент туманидаги дон қабул қилиш маскани омбори мудири Ж.Ҳ. жавобгар шахс бўлишига қарамасдан омборда сақлаб келинаётган буғдойни ноқонуний йўллар билан сотган. У ўз таниши Ж.М. билан тил бириктириб, омбордаги доннинг килосини 2800 сўмдан ҳисоблаб, 27 минг 560 килограмм буғдойни 78 миллион 400 минг сўмга баҳолаб, талон-торож қилган.
Жинояти фош этилган омбор мудири тезкор тадбир давомида фуқаро Ж.М.дан 27 минг 560 килограмм дон учун олган 78 миллион 400 минг сўм пулни ихтиёрий равишда қайтарган.
Ҳолат юзасидан фуқаро Ж.Ҳ. ва бошқаларга нисбатан Жиноят кодексининг 167-моддаси 2-қисми «а» банди (Ўзлаштириш ёки растрата йўли билан талон-торож қилиш) билан жиноят иши қўзғатилган. Ҳозирда жиноят иши юзасидан дастлабки тергов ҳаракатлари бошланган.
Бошқарма ахборот хизматининг қўшимча қилишича, «Когондонмаҳсулотлари» АЖга қарашли Қоровулбозор туманидаги дон қабул қилиш масканида ҳам 77 минг 900 килограмм дон камомади аниқланган. Мазкур ҳолат юзасидан ҳам жиноят иши қўзғатилиб, тергов ҳаракатлари олиб борилмоқда.
Изоҳ (0)