Қирғизистондаги инсон ҳуқуқлари ҳимоячиларидан бири Азимжон Асқаров 69 ёшида Чуй вилояти Жани-Жер қишлоғида жойлашган 19-колонияда вафот этгани ҳақида хабар берилганди.
«Kun.uz»нинг Ўзбекистон Ташқи ишлар вазирлигига таяниб хабар беришича, асли ўзбек Азимжон Асқаровнинг жасади Ўзбекистонда дафн этилади.
Ташқи ишлар вазирлигининг маълум қилишича, Азимжон Асқаровнинг рафиқаси, ўғли ва бошқа оила аъзоларининг унинг Ўзбекистон ҳудудида дафн этилиши ҳақидаги мурожаатига биноан Қирғизистон томони билан тегишли маслаҳатлашувлар ўтказилган.
Ўзаро музокаралар натижасида ушбу мурожаатни кўриб чиқиш ва уларнинг талабларини қаноатлантириш юзасидан келишувга эришилган.
Азимжон Асқаров — Қирғизистондаги энг машҳур инсон ҳуқуқлари ҳимоячиларидан бири, у 10 йилдан буён қамоқхонада эди. У 2010 йил 15 июнда Қирғизистон жанубидаги миллатлараро зиддият туфайли оммавий тартибсизликларни ташкил қилганлик ва милиция ходимининг ўлдирилишида иштирок этганликда айбланиб, ҳибсга олинган. 2010 йил 15 сентябрда суд Асқаровни бир умрга озодликдан маҳрум қилган, бироқ у ўз айбини тан олмаганди.
БМТнинг инсон ҳуқуқлари бўйича қўмитаси Асқаровга нисбатан куч ишлатилгани, зўравонлик қилингани, инсон ҳуқуқлари ҳимоячисига нисбатан суд иши адолатсиз тарзда кўриб чиқилганини қайд этган. Инсон ҳуқуқлари ҳимоячилари Асқаровга нисбатан жазонинг бу қадар оғир бўлганини унинг бевосита милиция томонидан фуқароларга нисбатан қилинган зўравонликлар юзасидан журналистик суриштирувлар ўтказгани ва уларни фош этгани билан боғлаган.
2016 йилда БМТнинг инсон ҳуқуқлари бўйича қўмитаси Қирғизистон ҳукуматидан Асқаровга нисбатан қўлланилган жазони бекор қилиш ва уни гаров эвазига озод этишга чақирган, аммо ушбу масала очиқ қолган эди.
Изоҳ (0)