Ўзбек томошабинларига «Элчининг қизи», «Пул ва гул ишқи» сериалларидаги ижроси била яхши таниш бўлган турк актёри Энгин Акюрек ҳақидаги маълумотларни эътиборингизга ҳавола этамиз.

Энгин 1981 йил 12 октябрда Анқарада дунёга келган. Мактаб йилларида футбол ўйнаш, гитара чалиш билан шуғулланган Энгиннинг келажакда актёр бўлиши етти ухлаб тушига ҳам кирмаган. Мактабни битириб Анқара давлат университетига қабул қилинган бўлажак актёр «Лингвистика ва тарих» йўналиши бўйича таълим олган. Талабалик йилларида драма тўгаракларига қатнашгани унинг касб билан боғлиқ танлови аниқ бўлишида муҳим рол ўйнаган.

2004 йилда университетни тамомлаганидан кейин ёш истеъдод эгалари учун мўлжалланган «Туркия юлдузлари» шоусида қатнашиб, «Энг яхши актёр» номинациясига лойиқ деб топилган. Шундан кейин унга «Хорижлик куёв» сериалида рол ижро этиш учун таклиф келиб тушади. «Фотмагулнинг айби нима?» ва «Пул ва гул ишқи» сериалидаги ролларидан кейин эса Энгин машҳурликка эришади.

Туркиядаги энг талабгир ва кўркам актёрлардан бири саналадиган Энгиннинг ёзувчилик қобилияти ҳам йўқ эмас. Унинг материаллари Kafasına Göre журналида чоп этилади.

Суратга олиш ишлари 2019 йилда бошланган «Элчининг қизи» сериалида Неслиҳан билан бирга бош қаҳрамон ролини ижро қилганидан кейин актёр ҳаётида ўзгариш юз берган. Турк ахборот агентликлари маълумотига кўра, шахсий ҳаётини бошқаларга кўз-кўз қилишни истамайдиган Энгин сериалда рафиқаси ролини гавдалантирган Тулкан Азкан билан муносабат бошлаган ва бирга сайр қилаётганида папарацси нишонига учраган. Уларнинг муносабатлари қанчалик жиддий ва келажаги бор ёки йўқлигини эса вақт кўрсатади.