Россияда коронавирусга чалинганлар 800 минг нафардан ошди

Россияда коронавирус билан касалланганларнинг умумий сони 800 минг кишидан ошди, дея хабар бермоқда «Meduza».

Россиянинг COVID-19’га қарши кураш бўйича федерал штаб бошқармаси маълумотларига кўра, 2020 йил 24 июль куни 5 811 нафар одамда вирус аниқланди.

Энг кўп касалланиш ҳолатлари Москвада (+645 одам), Свердловск вилоятида (+248), Ханти-Мансийск автоном округида (+196) ва Нижний Новгород вилоятида (+194) аниқланган.

Россияда охирги сутка давомида 154 киши коронавирусдан вафот этган. Шундай қилиб, касаллик қурбонларининг умумий сони 13 466 нафарга етган.

Шу вақтгача мамлакатда коронавирус ташхиси қўйилган 588 774 киши соғайган. Охирги 24 соат давомида эса 8 444 киши шифохоналардан чиқарилган. Ҳозирда Россияда 199 029 нафар бемор COVID-19’дан даволанмоқда.

Роспотребнадзорнинг хабар беришича, кун давомида Россияда 299 мингта коронавирус учун тест топширилган. Эпидемия бошланганидан бери бундай тестлардан 26,3 миллионта ўтказилган.