«Манчестер Сити» вингери Раҳим Стерлинг Adidas компанияси билан рекорд миқдордаги шартнома имзолайди. Бу ҳақда The Times хабар бермоқда.

Манбага кўра, англиялик футболчи агар зарур шартларни бажарса, немис компаниясидан бир мавсум учун 10 миллион фунт стерлингдан кўпроқ пул олади. Бу британиялик футболчилар учун рекорд миқдордаги шартнома ҳисобланади.

Қайд этиш жоиз, Стерлингнинг Nike компанияси билан амалдаги шартномаси шу йилнинг 31 июль куни якунланади.

Тахминларга кўра, Аdidas ярим ҳимоячини «Реал» сафида кўришни хоҳламоқда. Маълумки, Мадрид клуби узоқ йиллардан бери Аdidas либосларидан фойдаланади.

Аввалроқ Стерлингнинг Аir Jordan билан тузилган шартномадан 100 миллион фунт стерлинг ишлаб топиши, вингер эса ушбу бренд буцаларидан фойдаланиши ҳақида хабар берилганди. Бундан ташқари, футболчи Puma билан 100 миллион фунтлик келишувга яқин тургани ва Nike унга яна йилига 10 миллион фунтлик шартнома таклиф қилиши мумкинлиги айтилди.

Стерлинг ушбу мавсумда Англия чемпионати баҳсларида 32 та ўйинда майдонга тушиб, 19 та гол урди ва 5 та голга ҳаммуаллифлик қилди.

Раҳим Стерлингнинг «Манчестер Сити» сафида АПЛда урган барча голларини томоша қилинг (видео)