АОКАда 22 июль куни 2020/2021 ўқув йили учун олий таълим муассасаларининг бакалавриат таълим йўналишларига абитуриентларни онлайн рўйхатга олиш якунлари, таҳлил ва хулосаларига бағишланган матбуот анжумани ўтказилди.
«Дарё» мухбирининг хабар беришича, тадбирда Давлат тест маркази бош бошқарма бошлиғи Барно Ражабов айни кунларда кўпчиликни қизиқтирган масала — тест синовлари қачон ўтказилиши ҳақидаги саволга жавоб берди.
«Барчамизга маълумки, 1 августгача карантин чекловлари белгиланган. Шу сабабли тест синовларини кейинги муддатларга, яъни карантиндан кейин ўтказиш бўйича таклифлар берганмиз. Агар карантин чекловлари 15 августгача узайтирилса, имтиҳон 15 августдан кейин, чекловлар 1 сентябргача давом этса, сентябрь ойида ўтказилади. Бу ҳақда махсус комиссия қарори чиқмагунича аниқ бир нарса дея олмаймиз», — деди у.
Ражабовнинг қайд этишича, имтиҳонлар ўтказиладиган жойлар ҳали тасдиқланмаган. Аввалроқ сўнгги йилларда асосий имтиҳон олиш жойларидан бири бўлиб келган «Ўзэкспомарказ» кўргазмалар маркази коронавирусга чалинган беморларни қабул қилиш учун мослаштирилган эди. «Тасдиқлангандан кейин маълум қиламиз. Стационарга айлантирилган павильонларда имтиҳон ўтказилмайди», — дея қўшимча қилди ДТМ вакили.
Изоҳ (0)