Бухоро вилоят ҳокимлигида коронавирус инфекцияси кириб келишининг олдини олиш бўйича ташкил этилган махсус штаб масъулларининг «Дарё»га хабар беришича, ҳокимнинг аҳолига мурожаатидан сўнг даволаш-профилактика сифатини яхшилаш мақсадида амалий ишлар бошланган.
Билдирилишича, 2020 йилнинг 19 июль куни коронавирус билан оғриган беморларга ёрдам бериш, уларнинг нафас йўлларида келиб чиқаётган муаммоларга қарши самарали курашда кислород таъминотини яхшилаш мақсадида вилоятдаги тиббиёт муассасалари учун ҳар бири 12 миллион сўм турувчи 50 дона тиббиёт концентратори сотиб олинган.
Таъкидлаш лозим, 2020 йил 20 июль куни Шавкат Мирзиёев Ўзбекистонда коронавирус инфекциясига қарши кураш борасида олиб борилаётган ишларнинг чуқур танқидий таҳлилига бағишланган видеоселектор йиғилишида концентраторларни Ўзбекистонга олиб келиш учун махсус самолёт ажратиш ҳақида кўрсатма берганди.
Бундан ташқари, айнан коронавирусга қарши даво чоралари кўрилаётган муассасаларда, жумладан, вилоят кўп тармоқли тиббиёт маркази, болалар кўп тармоқли тиббиёт маркази, вилоят кардиология диспансери, вилоят юқумли касалликлар шифохонаси ва бошқа тиббиёт бирлашмаларига беморлар саломатлигини тиклаш мақсадида Соғлиқни сақлаш вазирлиги томонидан 100 дона махсус СИПАП аппарати тақдим этилган.
«Муассасаларни қиймати 84 миллион сўм бўлган кўп функцияли СИПАП замонавий ускунаси билан таъминлашда бевосита Бухоро вилояти ҳокимининг ташаббускорлиги алоҳида аҳамият касб этди», — дейди коронавирус инфекцияси кириб келишининг олдини олиш бўйича махсус штаб қошида ташкил этилган таҳлилий марказ масъули.
Эслатиб ўтамиз, Бухорода коронавирусга чалинган беморларни стационар шароитда даволаш учун 930 та ўрин ҳозирлангани, 10 минг нафар беморга етадиган, умумий қиймати 5,2 миллиард сўмлик 49 турдаги дори воситалари захираси яратилгани ҳақида хабар берилганди. Шунингдек, ҳудуддаги оилавий поликлиникаларга ҳам 10 та Damas ажратилганди.
Изоҳ (0)