Зоир Мирзаев: «Қашқадарёда коронавирусдан даволанаётган 75 нафар бемор 6 та сектор раҳбари назоратида»

Қашқадарё вилояти ҳокими Зоир Мирзаев вилоятда коронавирусдан даволанаётган беморлар олтита сектор раҳбари назоратида ва жавобгарлигида эканлигини маълум қилди. Бу ҳақда вилоят раҳбарининг аҳолига қилган мурожаатида айтилди, дея хабар берди «Дарё» мухбири.

Вилоят раҳбарининг таъкидлашича, ҳудудда ҳозиргача 409 нафар касалланган фуқаро аниқланган бўлиб, 318 нафари соғайган.

20 июль ҳолатига кўра, касалликдан даволанаётган 75 нафар бемор вилоят ҳокими, прокурори, ИИБ бошлиғи, Солиқ бошқармаси бошлиғи, ДХХ ва Миллий гвардия раҳбарларининг шахсан назоратида турибди.

Зоир Мирзаевнинг қўшимча қилишича, 2020 йилнинг 20 июль ҳолатига кўра, вилоятда 9590 та захира ўрни яратилган. Шунингдек, вилоятда 10 июль қадар мавжуд бўлган, кунига 750-800 та таҳлил олиш имконини берувчи иккита ПЗР лабораторияси Қарши шаҳридаги тўртта, Шаҳрисабз шаҳридаги иккита ва Ғузор туманидаги Uzbekistan GTL заводидаги яна битта лаборатория ҳисобига 10 тага етган.

Ҳозирда Қашқадарёда жами 147 та тез ёрдам пункти мавжуд бўлиб, унда 244 та тез тиббий ёрдам бригадаси фаолият юритади. Тез тиббий ёрдам бригадасига 206 та Damas, 247 та бошқа турдаги машиналар хизмат кўрсатади.

Вилоятда коронавирусга қарши курашиш учун 5280 нафар тиббиёт ходими жалб қилинган.

«Ишонч телефонларига кунига ўртача 185 та қўнғироқ бўляпти ва улардан 40-42 таси озиқ-овқат ёки дори-дармон сўрамоқда», — дейди Call-марказда аҳоли мурожаатини шахсан тинглаган Зоир Мирзаев.

Қайд этилишича, Қарши давлат университетида ташкил этилган Call-марказдаги (75) 220-03-00 рақамига жавоб бераётган 15 кишидан ташқари шифокорлар ҳам жалб қилинган бўлиб, касаллик билан боғлиқ саволларга аниқ ва ўз вақтида жавоб берилмоқда.