Жаҳон соғлиқни сақлаш ташкилоти раҳбари Тедрос Гебрейесус дунёнинг турли мамлакатларида коронавирус инфекцияси тарқалишининг тўртта сценарийсини айтиб ўтди. Бу ҳақда ташкилот брифингида маълум қилинди.
Биринчи сценарийга кўра, эпидемия Жануби-шарқий Осиё, Тинч океани, Кариб денгизи ва Африка мамлакатларида ривожланган бўлиб, улар вазиятни назоратга олган.
Иккинчи сценарийга кўра, Европада тарқалган бўлиб, касаллик кенг ўчоқлари авж олган. Аммо «кучли раҳбарият ва аҳолининг асосий тавсияларга амал қилиши натижасида» уларни бостиришга эришилди. «Европанинг кўплаб мамлакатлари вируснинг йирик ўчоқларини назоратга олиш мумкинлигини исботлади», — дейди ЖССТ раҳбари.
Учинчи сценарий касаллик биринчи тўлқиннинг энг юқори чўққисидан ўтган, аммо карантинни юмшатиб ҳозирги кунда касаллик яна авж олишига дуч келган мамлакатларда (Гебрейесус айнан қайси мамлакатлар эканига аниқлик киритмаган) амалга ошмоқда. «Дунёнинг бир қатор мамлакатларида биз касалланиш ҳолати ортаётганининг гувоҳи бўляпмиз, касалхоналар яна тўлмоқда», — деб таъкидлаган у.
Тўртинчи сценарий Шимолий ва Жанубий Америка, Жанубий Осиё ва Африканинг айрим мамлакатларида кузатилган касалланишлар сонининг кескин ошишидир. Гебрейесуснинг сўзларига кўра, коронавирус пандемиясининг эпицентри сифатида икки Америка қолаётган бўлиб, уларга жами касалланганларнинг 50 фоизи тўғри келади.
«Мен аввал ҳам айтганман ва яна қайтараман: мамлакат эпидемиологик чизиқнинг қаерида бўлмасин, қатъий чоралар кўришга ҳеч қачон кеч эмас», — деб таъкидлаган ЖССТ раҳбари.
Жонс Ҳопкинс маълумотларида дунё бўйича 13,1 миллион киши COVID-19 билан касаллангани, беморларнинг 573 мингдан ортиғи вафот этгани қайд этилган.
Аввалроқ ЖССТ раҳбари Тедрос Гебрейесус коронавирус пандемияси тугамаётгани, аксинча тезлашаётганини маълум қилганди. Ташкилотнинг Россиядаги вакили Мелита Вуйнович ҳам коронавирус ўзгармагани, касалликнинг жиддийлиги аввалгидек қолганини айтган.
Изоҳ (0)