АҚШ хориждаги активлар назорати бошқармаси Хитойнинг Шинжон-Уйғур автоном ҳудудида инсон ҳуқуқлари меъёрларининг бузилиши сабаб мазкур вилоятдаги амалдорларга нисбатан янги санкциялар қўллади. Бу ҳақда бошқарманинг расмий сайтида хабар қилинган.
Хабарга кўра, санкциялар АҚШдаги «Global Magnitskiy» қонуни доирасида қўлланилган, унга мувофиқ бу каби чекловлар инсон ҳуқуқлари поймол қилинган давлатларга нисбатан жорий қилинади.
Бундан ташқари, санкцияларга Шинжон-Уйғур автоном вилояти Сиёсий бюро марказий кенгаши партия қўмитаси котиби Чэнь Цюаньго, Хавфсизлик бошқармаси собиқ партия котиби Хо Люцзюнь, ушбу бошқарма директори ва партия котиби Ван Миншань ҳамда ҳудуд партияси собиқ котиби муовини Чу Хайлунь ҳам учраган.
«Мазкур ташкилот ва мансабдорлар Шинжондаги этник озчиликни қийноққа солганлик, инсон ҳуқуқларини камситишда иштирок этган, улар асоссиз равишда одамларни ҳибсга олиш ва уларга нисбатан жисмоний зўравонлик ишлатилишига бевосита алоқадор, шунингдек, уйғурлар – турк мусулмон аҳолиси, Шинжоннинг туб аҳолиси ва ҳудуддаги бошқа этник озчиликни қийноққа солган», – дейилади АҚШ давлат идорасининг хабарида.
Санкциялар АҚШ юрисдикциясига кирадиган юқорида баён этилган мансабдорлар ва ташкилотларнинг активларини музлатиш, уларнинг иш контактларини тақиқлаш ва АҚШ ҳудудига киришини тақиқлашни назарда тутади.
АҚШ Тибетда ва Уйғур-Шинжон вилоятида уйғурлар ва бошқа мусулмон гуруҳларига нисбатан инсон ҳуқуқларини бузганлик учун Хитойга нисбатан санкциялар қўллашини билдирган. Шунингдек, Хитой ишлаб чиққан Гонконгнинг юқори автономиясини ҳимоя қилиш бўйича қонун лойиҳасига ҳам эътироз қилган. Хитой ҳукумати барча айбловларни инкор этиб, танқидларга жавобан мамлакатнинг ички сиёсатига аралашмасликни сўраган.
Изоҳ (0)