Ўзбекистон олий таълим муассасаларида 2020 йилдан бошлаб сиртқи таълим 100 фоиз масофавий шаклда амалга оширилади. Бу ҳақда олий ва ўрта махсус таълим вазири Иномжон Мажидов АОКАда 9 июль, пайшанба куни бўлиб ўтган брифингда маълум қилди.
Иномжон Мажидовнинг айтишича, айни пайтда давом этаётган абитуриентларнинг ҳужжат топшириш, рўйхатдан ўтиш муддатлари ўзгармайди. Ҳужжатларни қабул қилиш белгиланган муддатларгача давом этади.
Вазирнинг қайд этишича, сиртқи таълим 100 фоиз масофавий таълим шаклига ўтади. Кечки таълим шакли бўйича ишлар режалаштирилган, қандай вазият бўлишидан қатъи назар, кечки таълим 50 фоиз масофавий шаклга ўтади.
«Кундузги таълим борасида қандай йўл тутилиши карантин шароитидан келиб чиқиб белгиланади», — деди олий ва ўрта махсус таълим вазири.
Эслатиб ўтамиз, 2020/2021-ўқув йили учун абитуриентларнинг ҳужжатлари ДТМ сайти ва Ягона интерактив давлат хизматлари портали орқали қабул қилинмоқда. Ҳужжатлар 20 июндан 20 июлгача (20 июль куни ҳам) қабул қилинади. Тест синовлари карантин қоидаларига қатъий риоя этилган ҳолда бир кунда икки ёки уч сменада ўтказилади,
ОТМларга кириш имтиҳонларини 25 июлдан 20 августгача ўтказиш режалаштирилаётганди. Бироқ Ўзбекистонда коронавирус билан боғлиқ вазиятнинг кескинлашаётгани сабабли 10 июлдан 1 августгача мамлакатда қатъий карантин чоралари жорий қилинади.
Аввалроқ Давлат тест маркази давлат олий таълим муассасаларининг бакалавриат таълим йўналишларига кириш имтиҳонлари онлайн ўтказилиши мумкинлиги ҳақидаги хабарларни рад этганди.
Изоҳ (0)