Дунё бўйича коронавирусдан фориғ бўлганлар сони 6 миллион нафардан ошди. Бу ҳақда АҚШнинг Жонс Ҳопкинс университети онлайн тарзда тақдим этиб бораётган COVID-19 ҳақидаги статистик маълумотларда келтирилган.
5 июль куни Тошкент вақти билан соат 20:30 ҳолатига кўра, коронавирусдан тузалганлар сони 6 111 195 нафарни ташкил қилмоқда. Соғайганларнинг аксар қисми Бразилия (1 013 951 нафар), АҚШ (894 325 нафар), Россия (449 995 нафар), Ҳиндистон (409 083) ва Чили (257 451) каби мамлакатлар фуқаролари ҳисобланади.
Тузалганлар сони бўйича етакчилик қилаётган давлатлар касалланиш кўрсаткичида ҳам пешқадам бўлиб турибди. Хусусан, АҚШда дунёдаги коронавирус юқтириб олиш ҳолатларининг чорак қисми — 2 841 124 кишида COVID-19 аниқланган. Бразилияда касалланганлар сони 1,5 миллион нафардан ошиб кетган, Россияда 680 минг нафардан зиёд, Ҳиндистонда 673 мингдан кўпроқ, Чилида қарийб 292 минг бемор инфекцияни юқтириб олган.
Бутун дунёда коронавирусга чалинганлар сони 11 304 534 нафарга етган. Пандемия қурбонларининг сони 531 659 нафарни ташкил қилмоқда. Энг кўп ўлим ҳолати АҚШда кузатилган — 129 689 нафар одам. Кейинги ўринларни Бразилия (64 265), Буюк Британия (44 283), Италия (34 854), Мексика (30 366), Франция (29 896) ва Испания (28 385) эгаллаб турибди.
Маълумот учун, 2020 йил 23 июнда дунё бўйича коронавирус билан касалланганлар сони 9 миллиондан, 28 июнь куни 10 миллиондан, 4 июлда эса 11 миллиондан ошиб кетганди.
Жаҳон соғлиқни сақлаш ташкилоти 4 июль куни бутун дунёда коронавирус билан касалланишнинг янги рекорд кўрсаткичини қайд этган. Шу куни бир сутка ичида дунёда COVID-19 билан касалланганлар сони 212 326 кишига ортган.
Изоҳ (0)