Ўзбекистонлик таниқли футбол мутахассиси «Сурхон» футбол клубида иш бошлайдиган бўлди.
Клуб матбуот хизмати хабарига кўра, Равшан Ҳайдаров расман «Сурхон» футбол клуби бош мураббийи этиб тайинланди.
«Ишонамизки, Равшан Ҳайдаров ўзига билдирилган ишончни оқлаб, Сурхондарё футболи равнақига ҳам ўз ҳиссасини қўшади», — дейилади хабарда.
Ҳозирча шартноманинг тафсилотлари маълум қилинмаган. Эслатиб ўтамиз, аввалроқ «Сурхон» бош мураббийи Баҳром Ҳайдаров истеъфога чиқарилганди. Аммо унинг клуб тизимида қолиши хабар қилинганди.
«Сурхон» Соса-Сола Суперлига 7-туридан кейин 4 очко билан 12-ўринда бормоқда.
Маълумот учун, Равшан Ҳайдаров мураббийлик фаолиятини Тошкентнинг «Трактор» клубида бошлаган. Шунингдек, у узоқ йиллар давомида «Пахтакор» клуби тизимида академия бош директорилигидан тортиб то асосий жамоа бош мураббийлигигача бўлган лавозимларда фаолият юритган. 2002—2005 йилларда Ўзбекистон миллий терма жамоасига ҳам устозлик қилган. Терма жамоа унинг қўл остида Осиё Кубоги—2004 да чорак финал босқичига қадар етиб борган. Унинг сўнгги иш жойи Ўзбекистон U-23 терма жамоаси бўлиб турган эди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)