Тошкент давлат транспорт университети ва Франция таълим муассасалари ўзаро ҳамкорлик қилиш ишларини муҳокама қилди

Ўзбекистон Республикаси Транспорт вазирлиги кўмагида Европада авиация соҳасидаги энг катта ўқув юрти ҳисобланган Франциянинг Фуқаролик авиацияси миллий мактаби (ENAC – École nationale de l’aviation civile) ҳамда Тулуза бизнес мактаблари билан ҳамкорлик алоқаларини ўрнатиш, келажакда мамлакатда авиация соҳаси учун малакали учувчилар, етук мутахассисларни тайёрлаш мақсадида видеомулоқот ташкил этилди, дея хабар беради вазирлик ахборот хизмати.

Қайд этилишича, видеомулоқотда Франциянинг Фуқаролик авиацияси миллий мактаби, Тулуза бизнес мактаби ҳамда Airbus компаниясининг вакиллари билан Ўзбекистон Республикаси Транспорт вазирлиги ва Тошкент давлат транспорт университети ўртасидаги истиқболли режалар муҳокама қилинган.

Видеомулоқотда Франциядан ENAC мактабининг директори ўринбосари – халқаро ишлар бўйича директор Николас Касалис, ENAC учувчилар мактаби директори Тери де Баскиа, Тулуза бизнес мактабининг авиация соҳасида бизнес бошқаруви магистратураси йўналишини мувофиқлаштирувчи директори Кристоф Бенароя, Ўзбекистон Республикасидан транспорт вазирининг ўринбосарлари Жасурбек Чориев ҳамда Акмал Мирзаев, Тошкент давлат транспорт университети ректори Одил Абдураҳмонов ва бошқа масъуллар иштирок этди.

Муҳокамалар якунида бир қатор йўналишларда меморандум тузишга келишиб олинди. Хусусан, Тошкент давлат транспорт университетида ўқув базасини яратиш, фуқаро авиацияси учувчиларини тайёрлаш юзасидан бакалавриат ва магистратура мутахассисликлари бўйича қўшма дастурлар тузиш кўзда тутилмоқда.

Шунингдек, учувчиларни тайёрлаш мақсадида талабалар академик мобиллик дастурларини йўлга қўйиш, профессор-ўқитувчиларни Фуқаролик авиацияси миллий мактабида малака ошириш ва стажировка дастурлари бўйича ўқишга юбориш назарда тутилди.