Тошкент темир йўл муҳандислари институтининг Россия университетларида ўқиётган 220 нафар талабаси чартер рейс билан Москвадан Тошкентга олиб келинди. Бу ҳақда «Ўзбекистон темир йўллари» компанияси маълум қилди.
Хабар берилишича, мазкур талабалар Бауман номидаги Москва давлат техника универститети, «МИСиС», Россия транспорт университети, Петербург давлат қатнов йўллари университети, Омск давлат қатнов йўллари университети ва Москва архитектура институтида бакалавриат, магистратура ва аспирантура босқичида таҳсил олмоқда.
Компания томонидан маълум қилинишича, олиб келинган барча талабалар Тошкент темир йўл муҳандислари институтининг талабалар турар жойида карантинга олинган. Карантин даврида талабалар учун барча зарур маиший шароитлар яратиб берилди. Уч маҳал иссиқ овқат, онлайн тарзда ўқишни давом эттираётган талабалар учун юқори тезликдаги интернет хизмати мавжуд. 14 кунлик карантин давридан сўнг барча талабалар уйларига юборилади.
Шунингдек, яқин кунларда Шимолий Кавказ кон-металлургия институтида таҳсил олаётган яна 102 нафар талабани Ўзбекистонга олиб келиш режалаштирилмоқда.
Мавзуга доир:Карантин сабабли Россиядаги 1000 нафардан ортиқ ўзбекистонлик талабага ёрдам кўрсатилди
Изоҳ (0)