Лукашенко Беларусь конституциясини ўзгартириш бўйича референдум ўтказишни ваъда қилди. У мамлакатнинг асосий қонунини икки марта ўзгартирган

Беларусда конституцияга ўзгартириш киритиш бўйича референдум ўтказилади. Бу ҳақда мамлакат президенти Александр Лукашенко Белта агентлигига маълум қилган.

«Конституция референдумда қабул қилинади, биз келажакда қайси йўлдан боришимизни аниқ белгилаб олишимиз зарур», — деган Беларусь етакчиси.

Унинг сўзларига кўра, конституцияга икки йилдан бери ўзгартириш киритишга тайёрланмоқда.

«Менга бир нечта вариант таклиф қилинди. Бироқ улар талаб даражасида эмас. Одамлар конституцияга қатъий ўзгартиришлар киритишга қўрқади», — деган Лукашенко.

У 1994 йилдаги конституциянинг қайтарилишига қарши эканини таъкидлади. Лукашенконинг сайловлардаги рақиби Виктор Бабарико ушбу ташаббусни илгари сурганди.

«Мен айримлар буни таклиф қилаётганига қарамай ўтмиш даврига қайтмоқчи эмасман, сиз учун ҳам буни маъқулламайман. Улар: «Биз 1994 йилга қайтиб шу давр конституциясини қайтаришимиз керак» деганди», — дея қайд этган Беларусь етакчиси.

Беларусь конституцияси 1994 йилда қабул қилинган. Лукашенко 1996 ва 2004 йилларда унга ўзгартириш киритган. Натижада президентнинг ваколатлари жиддий равишда кенгайган ва президентлик муддатларига қўйилган чекловлар олиб ташланганди.

Александр Лукашенко конституцияга яна ўзгартириш киритилиши ҳақида 2016 йилдан бери гапириб келади. Беларуснинг асосий қонунига парламентда овоз бериш ёки референдум орқали ўзгартириш ва қўшимчалар киритиш мумкин (конституциянинг айрим қисмларини фақат референдум билан ўзгартирилади). Ташаббусни президент, парламент ёки фуқаролар илгари суради, аҳоли 450 мингта имзо тўпласа халқ муҳокамаси амалга ошиши мумкин. Икки марта амалга ошган ўзгаришда Лукашенко ташаббуси билан референдумлар ўтказилган.

Виктор Бабарико — Лукашенконинг 9 августда ўтадиган президентлик сайловларидаги рақиби. У президентликка сайланса, Беларусга 1994 йилдаги конституцияни қайтаришни ваъда қилган. 18 июнда Бабарико ўзи раҳбарлик қилган «Белгазпромбанк»да молиявий жиноятларни амалга оширганликда айбланиб ҳибсга олинган. 19 июнда Бабарико штаби аввалроқ ёзиб қўйилган номзоднинг конституцияга ўзгартириш киритиш бўйича референдум учун имзоларни йиғиш ҳақидаги видеомурожаати эълон қилинган. Шунингдек, шу куни Минск аҳолиси президент сайлови кампанияси давомида сиёсатчилар ва фаолларнинг қўлга олинишига норозилик белгиси сифатида «бирдамлик занжир»ига тизилди. 20 июнда Европа иттифоқи Беларусь ҳукуматидан ҳибсга олинган номзод Бабарикони озод қилишни сўраган.