Исландиянинг амалдаги президенти Гудни Йоханнессон 27 июнь, шанба куни бўлиб ўтган навбатдаги сайловларда ғолиб чиқди. Бу ҳақда Iceland Monitor маҳаллий нашри хабар қилган.
Нашр берган маълумотларга кўра, Йоханнессон 92,2 фоиз овоз йиғган, унинг рақиби Гюрмундур Франклин Йонссон эса 7,8 фоиз овоз тўплаган. Аввал мамлакатда ўтказилган ижтимоий сўровномаларда Йоханнессоннинг номзодини 93,5 фоиз сайловчилар қўллаб-қувватлашга тайёрлиги маълум бўлганди.
Йоханнессон 1968 йил 26 июнда Рейкьявикда туғилган. У 2016 йилда 1944 йил мамлакат мустақил бўлганидан буён давлат раҳбарли сифатида сайланган энг ёш президентга айланганди.
Эслатиб ўтамиз, Исландия ҳукумати 15 июндан бошлаб хорижлик туристларнинг мамлакат ҳудудига киришига рухсат берган. 15 майдан эса Фарер ороллари ҳамда Гренландияда яшовчи фуқароларга икки ҳафталик карантинга риоя қилмасдан Исландия ҳудудига кириши мумкин деб белгиланганди.
Аввал фақат Шенген ҳудудидаги фуқароларнинг Исландияга киришига рухсат этилган, улар мамлакатга келганидан кейин 14 кун давомида карантинда бўлиши мажбурий деб белгиланган.
Изоҳ (0)