Қовоқлар шишиб уйғонишнинг сабаби нимада?

Уйқудан турганингизда қовоқларингиз шишган бўлиши нима билан боғлиқ? Қуйида ушбу саволга жавоб берамиз.

Турли воситалардан билар-билмас фойдаланиш

Кўз атрофи терисини билар-билмас парвариш қилиш, турли воситалардан фойдаланиш кабилар ҳам шишнинг сабабларидан бири ҳисобланади. Шишлардан қутулиш учун қилинган ҳаракатлар ҳам шунинг сингари кўз тагида қора халтачалар, ажин пайдо бўлишига олиб келиши мумкин. Бу ҳар қандай косметик восита ҳам ҳамманинг териси учун мўлжалланмагани ва тескари натижа бериши мумкинлигидан далолат. Парваришловчи крем суртилганидан кейин ортиқча қисми тери устида қолиб, намлик йиғади ва қарабсизки кўз тагида халтачалар пайдо бўлади. Шу сабаб ҳам бундай вақтда намлантирувчи кремлардан фойдаланмай туриш тавсия қилинади. Бундан ташқари кўз атрофига крем суртишда ҳам эҳтиёт бўлиш, киприкларга яқин, кўп миқдорда сурмаслик керак.

Уйқу билан боғлиқ муаммо

Тиниқиб ва тўйиб ухлаш — соғлом ташқи кўринишнинг гарови. Шу сабаб ҳам барча экспертлар уйқунинг меъёрда бўлишига бефарқ бўлмаслик кераклигини таъкидлайди. 7-8 соатдан кам ухламаслик, шу билан бирга ошириб юбормаслик ҳам тавсия қилинади. Чунки бу ташқи кўринишга, хусусан, қовоқлар шишига ҳам таъсирини ўтказмай қолмайди.

Овқатланиш

Ётишдан аввал ёғли, зарарли овқатланиш эртаси куни нафақат тарозида балки, ташқи кўринишингизда ҳам акс этмай қолмайди. Шуни инобатга олган ҳолда уйқуга ётишдан камида 3,5 соат аввал овқатланиш тавсия қилинади. Қолаверса, суюқлик ичишда ҳам эътиборли бўлиш, етарлича сув ичиш ва аксинча ошириб юбормаслик ҳам керак. Чунки бу организмда ортиқча суюқлик йиғилишига олиб келиши мумкин.

Аллергия қўзғатувчи косметик воситалар

Қовоқлар шишиши янги косметик воситани ишлатишни бошлаганингиздан кейин кузатилса, бу унинг таркибидаги қайсидир компонентнинг аллергия қўзғатаётганидан дарак беради. Бу каби оқибатлардан қочиш учун сифатли косметик воситалар харид қилишга ва арзонига учмасликка ҳаракат қилинг.

Шишларни бартараф қилиш мумкинми?

Ошхонада ишлатиладиган чой қошиқни олиб музлаткичга 1 соатга қўйинг. Вақт ўтгач, қошиқни бурун четидан қошингизнинг ташқи тарафи томон енгил ҳаракатлантиринг. Совуқ ҳарорат таъсирида шишиш кетади ва кўринишингиз соғлом ва тетик кўринади.