Соғлиқни сақлаш вазирлиги маълумотига кўра, коронавирусга чалиниш ҳолатлари нафақат Тошкент шаҳри ва Тошкент вилоятида, балки Сурхондарё ҳамда Хоразмда ҳам аҳоли орасида ҳам қайд этилмоқда.
«Профилактика мақсадида намуна топширган фуқароларда ҳам касаллик тасдиқланаётгани коронавируснинг одамлар орасида юқиш хавфини янада оширмоқда.
19 июнда Ўзбекистонда коронавирус инфекцияси тасдиқланган 179 нафар бемордан 29 нафари аҳоли орасида аниқланган бўлса, 20 июнь куни янг касалланиш ҳолатлари қайд этилган 207 нафар бемордан 19 нафари аҳоли орасида тасдиқланди.
20 июнда аҳоли орасида коронавирус аниқланиш ҳолатлари ҳудудлар кесимида: Тошкент шаҳрида 13 та, Тошкент вилоятида 4 та, Сурхондарё ва Хоразм вилоятида эса 1 тадан.
Тошкент шаҳридаги саноат корхонасининг 4 нафар ходими ва уларнинг 5 нафар оила аъзоларида, Учтепа тумани яшовчи М.М.да (оромгоҳга кетиш мақсадида намуна топширган), Миробод туманида яшовчи Н.Ш.да (профилактика мақсадида намуна топширган), Шайхонтоҳур туманида яшовчи уй бекаси Д.З.да (тана ҳарорати кўтарилиб, хусусий шифохонага мурожаат қилган), Олмазор тумани Мудофаа ишлари бўлими ходими Э.Ш.да (ҳарбий чақириққа келган болалар билан мулоқотда бўлган) касаллик қайд этилган.
Тошкент вилояти Қибрай туманида яшовчи Ш.Э.да (ишга кириш мақсадида намуна топширган), Мудофаа ишлари бошқармаси Юқори Чирчиқ тумани ходими Д.А.да (меҳнат таътилидан ишга чиққан ва тана ҳарорати кўтарилиши сабабли намуна топширган), Янгийўл туманида яшовчи М.М.да ва Чирчиқ шаҳрида яшовчи И.Н.да (профилактика мақсадида намуна топширишган), Сурхондарё вилояти Жарқўрғон тумани яшовчи Ш.Э.да (Тошкент шаҳрида ёлланма ишчи бўлган, тана ҳарорати кўтарилиб, ўзи намуна топширган) ҳамда Хоразм вилоятида Тошкент вилоятидаги МЧЖга қарашли юк автомашинаси ҳайдовчиси В.Т.да (вилоятга кириш блок постида намуна олинган) ҳам коронавирус инфекцияси тасдиқланган.
ССВ матбуот хизматининг хабар қилишича, ушбу ҳолатлар юзасидан эпидемиологик суриштирув ишлари олиб борилмоқда.
Ўзбекистонда COVID-19 коронавирус инфекциясини юқтириб олган беморларнинг 15 нафари оғир, 1 нафари эса ўта оғир аҳволда.
Эслатиб ўтамиз, Ўзбекистонда 20 июнь куни жами 207 кишида коронавирус аниқланган. Бу учинчи марта бир кун ичида 200 дан ортиқ одамда коронавирус аниқланиши, аввал 7 июнда 237 кишида, 16 июнда 230 кишида коронавирус аниқланган. Ҳозиргача Ўзбекистонда коронавирусга чалинган беморлар сони 6000 нафардан ошган. Беморлар сони 5000 дан 6000 га етиши учун 6 кун керак бўлди.
Изоҳ (0)