Футбол бўйича Ўзбекистон Суперлигаси 5-туридан ўрин олган «Навбаҳор»—«Бухоро» учрашувидан сўнг ҳар иккала жамоа бош мураббийлари иштирокида матбуот анжумани бўлиб ўтди.
Дастлаб меҳмонлар устози Мирислом Ҳасанов ўйин ҳақидаги фикрлари билан ўртоқлашди.
«Ўйин яхши бўлди. Футболчиларимизга раҳмат айтаман. Учта вазиятда бизга омад етишмади. Яққол вазиятларни қўлдан бой бердик. Ўйиндан ўйинга янада яхшироқ ҳаракат қила бошлаймиз, деб умид қилиб қоламан.
Бир нечта муҳим футболчиларсиз ўйнадик. Легионерларимиз пандемия сабабли етиб кела олмади. Ёшларга имкон беришга ҳаракат қилдик. Улар менимча, яхши ўйнади. Ҳужумларни якунлашда бироз тажриба камлик қилди. Лигада иложи борича юқорироқ ўринни эгаллашни мақсад қилганмиз. «Навбаҳор» яхши жамоа. Уларни ғалаба билан табриклайман. Келгуси ўйинларда омад тилаб қоламан», — дейди Ҳасанов.
Матбуот анжуманининг иккинчи қисмида «Навбаҳор» бош мураббийи Андрей Канчельскис қатнашди.
«Ўзингиз кўрдингиз, учрашув жуда оғир ўтди. Иккинчи таймда, айниқса, «Бухоро» клубига қарши туриш қийин кечди. Яхши вазиятлар яратдик, бироқ улардан унумли фойдалана билмадик. Акс ҳолда ҳисоб янада йирик кўриниш олиши мумкин эди.
Бухороликларга миннатдорчилик билдираман. Улар ўзларида юзага келган муаммоларга қарамасдан, кучли ўйин намойиш этди. Бир нечта вазиятда тажриба етишмади. Жамоа сўнгги ўринда бораётган бўлса-да, руҳий жиҳатдан анча чидамли эканлигини намойиш эта олди», — дейди россиялик мутахассис.
Мазкур ғалабадан кейин «Навбаҳор» очколари сонини 8 тага етказиб олган бўлса, «Бухоро» мавсумдаги 4-мағлубиятини қабул қилиб олди ва 1 очко билан ҳамон мусобақанинг сўнгги поғонасида бормоқда.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)