Футбол бўйича Ўзбекистон Суперлигасидан ўрин олган «Бунёдкор» ва «Қўқон-1912» жамоалари ўртасидаги баҳсдан (1:0) сўнг ҳар иккала жамоа бош мураббийлари ўйин ҳақидаги фикрлари билан ўртоқлашди.
Дастлаб мезбонлар устози Вадим Абрамов «Қўқон-1912»га қарши кечган учрашув ҳақида қуйидаги фикрларни билдирди:
«Узоқ танаффусдан кейин футболни соғинган эдик. Ўйинда ташаббусга эга бўлдик дея оламан. Айниқса, биринчи таймда яратган вазиятимиздан кейин рақиб яхши ҳимоялана олди. Иккинчи таймда ҳам ўз ўйинимизни кўрсата олдик ва якунда ғалабани қўлга киритдик.
Машғулот ўйини билан расмий учрашувларнинг фарқи бор. Ўйлашимча, 3-4 ўйиндан кейин керакли формани йиғиб оламиз. Бугун эътироз бўладиган кўп жиҳатлар ҳам шу каби камчиликларга боғлиқ. Умуман, ҳамма клублар ҳозир бир хил вазиятда».
Меҳмонлар бош мураббийи Бахтиёр Ашурматов эса ўйинга таркиб танлашда адашган бўлиши мумкинлиги ҳақида гапирди.
«Очиғи, 3 ой давомида футбол ўйнамадик. «Навбаҳор» билан ўртоқликдан кейин жамоамиз ҳолати яхши деб ўйлаган эдим. Лекин расмий ўйин барибир бошқача эканини кўрсатиб берди. «Бунёдкор» тўп назорати бўйича кучли эканини исботлади ва амалда ҳақли ғалабага эришди.
Балки, асосий таркиб танлашда адашгандирман. Қатор чизиқларда тенг кучли ўйинчилар бор. Аммо шу таркибда тўхталдик. Мезбонлар чуқур ҳимояланишга мажбур қилди ва бу амалда ўз натижасини кўрсатди. Бугунги ўйинга муносиб тайёргарлик кўрган эдик. Ҳамма режамизни амалга ошира олмадик. Фикримча, йигитларимиз ҳам камида дуранг учун меҳнат қилишган эди», — деди Ашурматов.
«Бунёдкор» ушбу ғалабадан кейин очколари сонини 9 тага етказиб, пешқадамларга («Пахтакор», «Насаф») етиб олган бўлса, қўқонликлар 6 очко билан 6-ўриндан жой олган.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)