Тошкент вилояти Қуйи Чирчиқ туманида 25 майдан 26 майга ўтар кечаси 30 ёшли аёлнинг уйига ўғирликка тушган шахс ушланди. Бу ҳақда Ички ишлар вазирлиги ҳузуридаги Тергов департаменти хабар берди.
Маълум қилинишича, 2020 йилнинг 25 майидан 26 майига ўтар кечаси номаълум шахс Қуйи Чирчиқ тумани Дўстобод шаҳрида яшовчи 30 ёшли аёл Ш.А.нинг уйига дарвоза орқали ғайриқонуний йўл билан кириб, унинг 2,5 миллион сўм пулини ўғирлаган. Шунингдек, мазкур шахс аёлнинг нархи 3 миллион сўм бўлган Artel телевизорини номаълум жисм билан уриб синдириб, яроқсиз ҳолатга келтирган ва ҳодиса жойидан яширинган.
Ҳолат юзасидан Қуйи Чирчиқ тумани ИИБ ҳузуридаги Тергов бўлими томонидан Ўзбекистон Республикаси Жиноят кодексининг 169-моддаси 2-қисми «г» банди (Ўғирлик) билан жиноят иши қўзғатилган.
Олиб борилган тергов-тезкор ҳаракатлари натижасида мазкур жиноятни 32 ёшли П.У. содир этганлиги аниқланган ва жиноят иши бўйича П.У. гумон қилинувчи тариқасида жалб қилинган. Ҳозирда дастлабки тергов ҳаракатлари олиб борилмоқда.
Изоҳ (0)