Twitter’да АҚШ президенти Дональд Трампнинг полиция томонидан қўлга олиш пайтда ўлдирилган афро-америкалик Жорж Флойд ҳақидаги нутқининг видео ёзувини блоклади. Hill нашрининг ёзишича, Трамп сайлов кампанияси штаб-квартираси саҳифасида жойлаштирилган видео муаллифлик ҳуқуқини бузгани учун ўчирилган.
Деярли 4 дақиқа давом этадиган ушбу видеода Трампнинг Флойд вафотидан бир неча кун ўтганидан кейин сўзлаган нутқи эшиттирилган бўлиб, унда тинч намойишчилар суратлари, шунингдек, оммавий тартибсизликлардан лавҳалар кўрсатилган. Унда президент дастлаб «катта фожиа» ҳақида, кейин эса «радикал сўл гуруҳлар»нинг «зўровонлик ва анархия»си ҳақида ҳамда ҳуқуқ тартибот органлар иши тўғрисида гапирган.
Нашрнинг ёзишича, видеода фойдаланилган камида битта сурат юзасидан унинг муаллифидан шикоят тушган. Сервис ушбу видеони боклагунча уни Трампнинг ўзи расмий саҳифасига улашишга, шунингдек, 7 мингга яқин фойдаланувчилар ҳам уни тарқатишга улгурган. Ҳозирда бу видеони кўриб бўлмайди.
Видео блокланганидан кейин Трамп командаси Twitter ва унинг асосчиси Жек Дорсини цензурада айблаб, фойдаланувчиларни видеонинг Youtube’да юкланган нусхасини тарқатишга чақирган.
Шунингдек, хабарда билдирилишича, сайловолди кампанияси вакиллари видеодан ким шикоят қилгани ва у қандай қилиб муаллифлик ҳуқуқини бузаётганини билиш учун Twitter’га мурожаат қилган.
Эслатиб ўтамиз, май ойи охирларида Twitter илк бор Трампнинг хабарини ўқувчиларга унинг ишончли эмаслигини, қайта текшириш талаб этилишини билдирувчи махсус белги билан ажратганди. Президент бу ҳолатни танқид қилиб ижтимоий тармоқни президентлик сайловларига аралашганликда айблаган, уни АҚШ ҳудудида ёпиб юбориш билан таҳдид қилганди.
Изоҳ (0)