Халқаро космик станция (ХКС)га икки астронавтни етказиши керак бўлган Crew Dragon кемаси Falcon 9 ракетаси билан Флоридадаги Кеннеди Космик маркази майдончасидан старт олди. Парвоз трансляцияси NASA’нинг YouTube’даги канали орқали намойиш этилмоқда.
Кема иккинчи уринишда орбитага учирилди — 27 май куни бўлиб ўтган биринчи уриниш стартга 16 дақиқа қолганида ноқулай об-ҳаво шароити сабаб қолдирилган эди.
Crew Dragon бортида икки астронавт — Дуглас Хёрли ва Роберт Бенкен бор. АҚШ учун бу 2011 йилдан бери ўз кемасида амалга оширилган биринчи бошқариладиган космик парвоздир.
Liftoff! pic.twitter.com/DRBfdUM7JA
— SpaceX (@SpaceX) May 30, 2020
Бундан ташқари, бу NASA томонидан хусусий компанияга топширилган илк бошқариладиган миссиядир: Dragon капсуласи NASA билан имзоланган шартнома асосида SpaceX компанияси томонидан ишлаб чиқилган.
NASA ва SpaceX 2014 йили Dragon юк кемасининг бошқариладиган версиясини яратиш учун қиймати 2,6 миллиард долларлик шартнома имзолаган эди.
Ушбу капсула NASA’га одамларни ХКСга Россиянинг «Союз» кемаларида юбориш эҳтиёжидан қутулиши учун керак. 2011 йили шатллар дастури ёпилганидан бери одамларни ХКСга юборишнинг ҳозиргача «Союз»дан бошқа варианти йўқ эди.
Изоҳ (0)