Президент қарори билан Сиддиқов Фурқат Аҳмедович Ўзбекистон Республикаси ташқи ишлар вазирининг ўринбосари лавозимига тайинланди. Бу ҳақда Адлия вазирлигининг «Ҳуқуқий ахборот» Telegram канали хабар қилган.
Фурқат Сиддиқов 1971 йилда туғилган. У 2015 йилдан бери Ўзбекистоннинг Покистондаги фавқулодда ва мухтор элчиси лавозимида ишлаб келаётганди.
Бунга қадар эса Ўзбекистоннинг АҚШдаги элчихонасида биринчи котиб лавозимида фаолият олиб борган.
2020 йил 23 апрелда Миллатлараро муносабатлар ва хорижий мамлакатлар билан дўстлик алоқалари қўмита раисининг ўринбосари сифатида ишлаб келган Эркин Ҳамроев ташқи ишлар вазирининг ўринбосари лавозимига тайинланган. 22 мартда Авазбек Ҳожиметов ташқи ишлар вазирлиги матбуот хизмати раҳбари, Раҳматулла Назаров Ташқи ишлар вазирининг маънавий-маърифий ишлар самарадорлигини ошириш, давлат тили тўғрисидаги қонун ҳужжатларига риоя этилишини таъминлаш бўйича маслаҳатчиси лавозимини эгаллаган. 20 мартда Ўзбекистоннинг Австриядаги элчиси, Европада хавфсизлик ва ҳамкорлик ташкилоти ва Вена шаҳридаги бошқа халқаро ташкилотлар ҳузуридаги доимий вакили бўлиб ишлаган Шерзод Асадовнинг ташқи ишлар вазирига ўринбосар бўлгани хабар қилинган. 25 февралда Ўзбекистоннинг Ҳиндистондаги фавқулодда ва мухтор элчиси Фарҳод Арзиев айни пайтда ташқи ишлар вазири биринчи ўринбосари этиб тайинлангани, собиқ биринчи ўринбосар лҳом Неъматов вазир ўринбосари сифатида лавозимини сақлаб қолгани маълум қилинган.
Изоҳ (0)