Тошкент вилояти ҳокими ҳайитлик улашди. Улар орасида уй ҳам бор
Тошкент вилояти ҳокими Рустам Холматов Рамазон ҳайити байрамида бир неча оилаларнинг хонадонида бўлиб, уларнинг ҳолидан хабар олди. Таъкидланишича, уларга эсдалик совғалар, 2 миллион сўмдан моддий ёрдам ва бошқа қимматбаҳо совғалар улашилган. Бу ҳақда вилоят ҳокимлиги ахборот хизмати хабар берди.
Вилоят раҳбари дастлаб Ўрта Чирчиқ туманинг «Ўртаовул» маҳалла фуқаролар йиғинидаги Ҳамдўстлик кўчаси 56-уйда истиқомат қилувчи Илёсовлар хонадонига ташриф буюрган. Уй бекаси Арабгул ая узоқ йиллардан бери оғир касаллик билан курашиб келади. Рустам Холматов оилага ҳайитлик улашиб, мулоқот давомида бу хонадонга келгусида ҳам зарур ёрдам кўрсатиш, аянинг фарзанди ва набиралари учун муносиб ҳаёт тарзини таъминлаш бўйича мутасаддиларга тегишли топшириқлар берган.
Рустам Холматов Нурафшон шаҳрида яшовчи турмушидан ажрашиб, фарзандларини ёлғиз ўзи тарбиялаб келаётган Зуҳра Дадаева уй-жойга муҳтожлигини ҳисобга олиб, яқин кунларда унга Нурафшон шаҳридан янги уй-жой ажратиб бериладиган бўлди.
Шунингдек, вилоят ҳокими Оққўрғон тумани «Зарбдор» маҳалла фуқаролар йиғинида бўлиб, ўзи оталиққа олган бир оиланинг тўрт қизи ҳолидан хабар олди. Яқинда ўтказилган «Минг оилага – минг туҳфа» акцияси доирасида қизларга соғин сигир берилган эди.
Мулоқот чоғида вилоят ҳокими қизларнинг келгуси ҳаёти, ўқиш ва ишлари билан қизиқди. Бири шифокор, иккинчиси биолог бўлишга ҳавасманд ёшлар ўз режа-мақсадларини гапириб берган. Вилоят ҳокими пойтахтдаги тўқимачилик корхоналаридан бирида меҳнат қилиб келаётган қизларнинг тўнғичи иш жойини яқинда Оққўрғон туманида фаолиятини бошлаган тўқимачилик корхонасига кўчириш, унга маълум енгилликлар бериш бўйича таклиф билдирди.
Шу куни Рустам Холматов Оққўрғон туманинг «Ҳамид Олимжон» фуқаролар йиғини Фидойи кўчасида истиқомат қиладиган Иккинчи жаҳон уруши қатнашчиси – 100 ёшдан ошган Файзулла бобо Нурматов хонадонида ҳам бўлди.
