Сурхондарёда Damas’га 14 йўловчи олган ҳайдовчи жаримага тортилди (видео)

Сурхондарё вилоятининг Шўрчи туманида Damas ҳайдовчиси машина салонига 14 йўловчи олиб ҳаракатлангани аниқланди. Бу ҳақда ЙҲХББ хабар бермоқда.

Сурхондарё вилояти ИИБ ЙҲХБ катта инспектори А.Чориев 23 май куни «Толли» маҳалласи ҳудудида ҳаракатланиб келаётган Damas’ни тўхтатиб текширганида, автомобиль салонида ўриндиқлар сонидан кўп миқдорда йўловчилар борлиги аниқланган.

Инспектор томонидан олинган ва ЙҲХББ томонидан эълон қилинган видеода инспектор Damas салонидан тушиб келаётган 14 йўловчини бирма-бир ҳисоблайди. Йўловчиларнинг аксарияти аёллар.

Ҳолат юзасидан ҳайдовчига нисбатан Йўл ҳаракати қоидаларининг 159-бандига асосан маъмурий баённома расмийлаштирилди. Ҳайдовчи Маъмурий жавобгарлик тўғрисидаги кодекснинг 128-моддасига биноан агар ҳайдовчи ушбу қоидабузарликни илк бор содир этаётган бўлса, базавий ҳисоблаш миқдорининг ярим баравари миқдорида жаримага тортилади. Бу 23 май ҳолатига кўра, 111 500 сўмга тенг. Агар ҳайдовчи илгари ҳам ушбу турдаги қоидабузарликни содир этган бўлса БҲМнинг бир бараваридан тўрт бараваригача жаримага тортилиши ва транспорт воситасини бошқариш ҳуқуқидан 6 ойга маҳрум этилиши мумкин.

«Карантин вақтида бу каби қўпол қоидабузарлик содир этиб юрган ҳайдовчи билан тушунтириш ишлари олиб борилган», — дейилади ЙҲХББ хабарида.