Хитой бозори учун мўлжалланган янгиланган Hyundai Santa Fe ўзгача олд панелга эга бўлади. Бу ҳақда интернетда тарқлаган суратларга таяниб, Motor хабар берди.
Суратлардан кўриш мумкинки, Hyundai Santa Fe’нинг олд панели тўлиқ ўзгаришга учраган. Марказий дефлекторлар юқорига кўтарилган, уларнинг ўрнида эса вертикал сенсор дисплей пайдо бўлади. Янги Mercedes-Benz S-Class’нинг архитектураси ҳам худди шу каби кўринишга эга. Унинг ҳам ташқи кўриниши ва интерьерининг суратлари премьерадан олдин ижтимоий тармоқларда тарқалиб кетган эди.
Ҳозирги Hyundai Santa Fe’нинг Хитойдаги премьераси Гуанчжоудаги автосалонда 2018 йили бўлиб ўтганди. Кроссовер ташқи кўриниши жиҳатдан глобал моделга ўхшайди, бироқ унинг ғилдираклар базаси 100 миллиметрга, умумий узунлиги эса 160 миллиметрга узайтирилган. Sаnta Fe орқа томондан C га ўхшаш фонарлари ва ён томонидан ўтган тўғри бел чизиғи билан ажралиб туради. Локал кроссовернинг ўзига хослиги — ҳайдовчининг бармоқ изи орқали ишлайдиган биометрик идентификация тизимига эга эканлигида.
Хитой бозорига мўлжалланган Hyundai Santa Fe’га 245 от кучига эга 2,0 литрли турбомотор ўрнатилган бўлиб, у саккиз поғонали автомат узатмалар қутиси ёрдамида бошқарилади. Кроссоверлар BАIC Motor ва Hyundai Motor Company қўшма корхонасига қарашли Beijing Hyundai заводида ишлаб чиқарилади.
Изоҳ (0)