Жанубий Кореяда роботлар ва автоматик кассалар хизмат кўрсатувчи кинотеатрлар иш бошлади

Жанубий Кореядаги CJ-CGV кинотеатрлар тармоғи Ёидо шаҳридаги залларини контактсиз иш режимига ўтказди, деб хабар берди «Кинопоиск».

Бу кинотеатр ходимлари билан коронавирусни юқтириш хавфи туфайли алоқа қилишни истамайдиган томошабинларни кинотеатрга жалб қилиш мақсадида қилинди.

Бунинг учун кинотеатр ходимлари ўрнини сунъий интеллектга эга роботлар, автоматик касса ва мобил дастурлар эгаллади.

Эндиликда Ёидо шаҳридаги CGV кинотеатр тармоғига ташриф буюрувчилар бошқа инсонлар билан бевосита алоқасиз кинога чипта сотиб олиши ва залга ўтиши мумкин. Улар махсус автоматлар орқали егулик ва ичимликларни ҳам сотиб олиши мумкин.

«Контактсиз хизматларга бўлган талаб ошиши прогноз қилинмоқда. Биз янгиликка томошабинлар реакциясини ўрганамиз ҳамда контактсиз хизмат кўрсатиш тизимини кенгайтирамиз», — дейди кинотеатр вакили.

Контактсиз тизимни Lotte Cinema тармоғи ҳам бир неча залларига жорий этди.