Бугун, 6 май куни, Ўзбекистон Президенти Шавкат Мирзиёев ва Туркманистон президенти Гурбангули Бердимуҳамедовнинг телефон орқали мулоқоти бўлиб ўтди, деб хабар бермоқда Президент матбуот хизмати.
Суҳбат чоғида Ўзбекистон—Туркманистон муносабатларининг жорий ҳолати ва уларни кенгайтириш истиқболлари муҳокама қилинган. Шунингдек, Ўзбекистонда Сардоба сув омборидаги фавқулодда вазият оқибатларини бартараф этиш билан боғлиқ масалаларга тўхталиб ўтилган. Коронавирус инфекциясининг тарқалиши билан боғлиқ эпидемиологик вазият хусусида ҳам фикр алмашилган.
Бундан ташқари, Ўзбекистон ва Туркманистон етакчилари халқаро сиёсат ва минтақавий ҳамкорликка оид қатор долзарб масалалар ҳам кўриб чиқилган.
Шавкат Мирзиёев 2 май куни Қозоғистон президенти Қосим-Жўмарт Тўқаев билан телефон орқали бўлиб ўтган мулоқотда Сардоба сув омборида юз берган ҳолатни муҳокама қилганди. Президент Сўронбой Жээнбеков билан ҳам Сардобадаги фавқулодда вазиятни муҳокама қилган.
Эслатиб ўтамиз, Шавкат Мирзиёев 5 май куни бўлиб ўтган видеоселектор йиғилишида Сардобадаги фалокатдан сўнг тўрт киши ҳалок бўлгани, бир киши бедарак йўқолганини қайд этган, ҳодиса айбдорлари, улар ким бўлишидан қатъи назар, қонун олдида жавоб беришини алоҳида, ишонтириб таъкидлаганди. Шунингдек, жабр кўрганларга ёрдам кўрсатаётган ўзбекистонликларга миннатдорчилик билдирган.
Изоҳ (0)