Англия Премьер Лигасининг энг қиммат клублари маълум бўлди. «Тоттенҳэм» 2,5 млрд фунтга баҳоланмоқда

Ливерпуль университетининг менежмент мактаби (ULMS) Англия Премьер Лигасининг энг қиммат клубларини маълум қилди.

Чемпионатнинг энг қиммат клуби сифатида «Тоттенҳэм» эътироф этилди. «Шпорлар» 2,5 миллиард фунтдан ортиққа баҳоланган. Иккинчи ўринни «Манчестер Сити» (деярли 2,2 миллиард фунт) банд этган бўлса, «Манчестер Юнайтед» (деярли 2,1 миллиард фунт) бу борада учинчи бўлди.

Фақатгина шу уч клуб 2 миллиард фунтлик довондан ўта олган. АПЛнинг энг арзон клуби сифатида «Борнмут» топилган. Унинг баҳоси 99 миллион фунтни ташкил этмоқда.

«Тоттенҳэм» 2018/19 йилги мавсумда Чемпионлар Лигаси финалига қадар етиб боргани ва чемпионатда кучли тўртликдан ўрин олгани учун Англиянинг энг қиммат клуби деб топилди. Шу билан бирга жамоанинг маошга ажратадиган маблағи 100—150 миллион фунтни ташкил этади. Бу кучли олтилик клублари орасида энг ками ҳисобланади.

Шу тариқа улар қолганларга қараганда кўпроқ фойда олди, бу эса жамоанинг рейтингдаги ўрнида ўз аксини топди», — дейди мазкур тадқиқотни олиб борган ULMS мутахассиси Киран Магуайр.

«Тоттенҳэм»нинг даромади 2018/19 йилги мавсумда 21 фоизга ўсган. Клуб бюджетининг 39 фоизини маошларга сарфлайди. Солиштириш учун, мазкур кўрсаткич «Лестер»да 84 фоизга тенг.

Шу билан бирга лондонликлар янги футболчилар трансферига 22 миллион фунт сарфлаган, бу борада фақат «Уотфорд» (21 миллион фунт) «Тоттенҳэм»дан камроқ пул ишлатган. Шунингдек, «шпорлар»нинг нархи ошишида янги стадионнинг ҳам катта ўрни бор.

Бир йил аввалги рўйхатда «Тоттенҳэм» учинчи ўринда қайд этилганди. Ўшанда клуб 1,8 миллиард фунтдан кўпроққа баҳоланганди.