Эрон ҳукумати чекловлар қўйиш ёки уни олиб ташлаш мақсадида мамлакатни коронавирус тарқалиши хавфига қараб бир неча ҳудудларга бўлди. «РИА Новости»нинг хабар беришича, бу ҳақда 26 апрель куни мамлакат президенти Ҳасан Руҳоний маълум қилган.
«Мамлакат оқ, сариқ ва қизил рангдаги уч ҳудудга бўлинади. Коронавирус чекловлари ва қоидалари ушбу уч зонали ажратиш доирасида амалга оширилади», — дейилади президентнинг расмий сайтида эълон қилинган баёнотда.
Ҳасан Руҳонийнинг айтишича, бундай бўлиниш жойлардаги коронавирусга чалиниш даражасига боғлиқ бўлиб, у ёки бу турга киришига қараб тегишли чоралар кўрилади. Хусусан, оқ рангга кирувчи жойларда масжидларни очиш, жума намози ўқилишига тақиқларни олиб ташлаш, шунингдек, аҳоли тўпланишига рухсат бериш кўзда тутилган.
Айни пайтда Эронда коронавирусга чалиниш ҳолати илк бор эълон қилинган 19 февралдан буён 90 мингдан ортиқ киши касалланган, уларнинг 5,7 мингдан ортиғи вафот этган, 70 мингга яқин киши тузалган.
Аввалроқ Исроил ташқи разведкаси Эрон, Ироқ, Ливан ва Сурияда коронавирус кенг тарқалган, бироқ уларда бу ҳақдаги маълумотлар камайтириб кўрсатилаётганини билдирганди. «Эронда эълон қилинаётган рақамлар ҳақиқатга тўғри келмайди», деб айтганди Исроил ташқи разведкаси Моссад раҳбари Йоси Коэн.
Изоҳ (0)