Навоийда гиёҳванд модда қабул қилиш учун тўпланган шахслар ушланди

Навоий шаҳрида карантин қоидаларини бузиб, қўлбола гиёҳванд модда қабул қилиш учун тўпланган 4 нафар шахс қўлга олинди. Бу ҳақда Навоий вилоят ИИБ ахборот хизмати хабар берди.

Маълум қилинишича, Навоий вилояти ИИБ ҳамда Навоий шаҳар ИИБ ходимлари томонидан тезкор тадбир ўтказилган. Тадбир давомида 1972 йилда туғилган А.Ю. карантин қоидаларини қасддан бузиб, шериклари 1979 йилда туғилган Н.О., 1974 йилда туғилган Ф.С. ҳамда 1977 йилда туғилган Ш.Э. билан «Дизоморфин» (Крокодил) қўлбола гиёҳванд моддасини истеъмол қилаётганида далилий ашёлар билан қўлга олинди.

Мазкур ҳолат юзасидан айбдорлар қонун доирасида тегишли тартибда жазоланади, дейилади ИИБ хабарида.

Аввалроқ Навоийда карантин вақтида ўз уйини дискотекага айлантирган ёшлар жаримага тортилгани ҳамда қиморхона ташкил қилган фуқарога нисбатан жиноий иш қўзғатилгани ҳақида хабарлар берилган эди.