Фарғона вилоят юқумли касалликлар шифохонасида икки ҳафта давомида коронавирус инфекциясига қарши курашган 73 нафар тиббиёт ходими бугун, 20 апрель куни, реабилитацияга кузатилди. Уларнинг ўрнида тиббиёт ходимларининг навбатдаги гуруҳи фаолият бошлади, дея хабар беради «Дарё» мухбири Азизжон Эрматов.
Шифохонани тарк этган тиббиёт ходимлари Фарғона туманидаги сиҳатгоҳда 14 кун давомида изоляция қилинади.
Ушбу шифохона жамоасининг халқаро стандартлар асосида олиб борган самарали даволаш муолажалари туфайли шу кунгача Фарғонада коронавирус инфекциясига чалинган беморларнинг 6 нафари бутунлай соғайиб, реабилитацияга кузатилган. Айни пайтда мазкур шифохонада 97 нафар бемор даволанмоқда.
Таъкидлаш лозим, коронавирусга қарши курашда иштирок этадиган шифокорлар ва бошқа ходимларнинг ҳар 14 кунлик фаолият даври учун махсус қўшимча рағбатлантириш тўлови белгиланган.
Унга кўра, врач-ходимларга, врач-лаборантларга — 25 миллион сўм; ўрта тиббиёт ходимларига, ҳамшира-лаборантларга — 15 миллион сўм; кичик тиббиёт ходимларига — 10 миллион сўм; бошқа ходимларга — 5 миллион сўмдан тўлаб берилади.
Шунингдек, беморлар билан ишлаш давомида коронавирус инфекциясини юқтириб олган тиббиёт, санитария-эпидемиология хизмати ва бошқа ходимларга 100 миллион сўмдан тўланади.
Эслатиб ўтамиз, Фарғонада коронавирусга чалинганлар 97 нафарга етди. Беморлар орасида ҳамширалар ҳам бор.
Изоҳ (0)