«Дарё» оқшоми: коронавирус пандемияси бўйича 20 апрелнинг асосий хабарлари

Жаҳондаги вазият

Жонс Ҳопкинс университетининг Тошкент вақти билан соат 19:20 даги маълумотларига кўра:

• дунё бўйича инфекция билан касалланганлар — 2 422 525 киши;
• касалликдан тузалганлар — 635 895 киши;
• инфекция оқибатида вафот этганлар — 166 235 киши.

АҚШда COVID-19 коронавирусидан вафот этганлар сони 40 минг нафардан ошиб кетди. Бу ҳақда Жонс Ҳопкинс университети тақдим этган статистик маълумотларда қайд этилган. Университет ахборотлари федерал ҳамда маҳаллий статистика, шунингдек, бошқа манбаларга асосланган. Мамлакатда касалланганлар сони 760 245 кишига етди.

Хитойда ўтган бир сутка ичида коронавирус билан касалланиш бўйича 12 та ҳолат аниқланди, 22 киши тузалди, вафот этганлар қайд этилмади. Аниқланган 12 ҳолатнинг 8 тасида коронавирус четдан, қолган 4 та ҳолатда мамлакатнинг ўзида юқтирилган. Айни пайтда Хитойда умумий ҳисобда 83 817 киши коронавирусга чалингани тасдиқланган, 4636 киши вафот этган, 77 084 киши тузалган.

Жанубий Кореяда бир сутка ичида коронавирус билан касалланиш бўйича 13 та ҳолат аниқланиб, касалланганларнинг умумий сони 10 674 кишига етди. Шундан 72 нафари тузалган, 236 киши вафот этган.

Қозоғистонда COVID-19 коронавирус инфекцияси билан касалланганлар сони 1775 кишига етди, 19 киши вирус қурбонига айланган. Шунингдек, 401 бемор даволанишга муваффақ бўлган.

Қирғизистонда COVID-19 коронавирус инфекцияси билан касалланганлар сони 568 кишига етди, уларнинг 140 нафари — тиббиёт ходимлари. Касаллик оқибатида вафот этганлар сони етти кишига етди, 11 нафар бемор оғир аҳволда.

Ўзбекистондаги вазият

Ўзбекистонда 20 апрель соат 18:00 кўра, коронавирус инфекциясини юқтириб олиш билан боғлиқ 39 ҳолат тасдиқланиб, касалланганлар сони 1604 кишига етди. Давлат бош санитария инспектори Нурмат Отабековнинг «Ўзбекистон 24» телеканали орқали берган баёнотида 20 апрель соат 10:00 ҳолатига кўра, коронавирусга чалиниш билан боғлиқ ҳолатлар сони ўзгаришсиз қолгани маълум бўлганди.

Фарғона вилоятида коронавирусга чалинганлар сони 97 кишига етди. Инфекцияни юқтириб олганлар орасида икки нафар ҳамшира ҳам бор. Вилоят соғлиқни сақлаш бошқармаси бошлиғи Одилжон Умаровнинг маълум қилишича, ҳамширалар коронавирус инфекциясини беморларга тиббий ёрдам кўрсатиш вақтида юқтириб олган.

Ўзбекистонда коронавирус инфекциясини юқтириб олиш билан боғлиқ 19 апрель куни 75 та янги ҳолат тасдиқланганди. Таққослаш учун, 13 апрель куни 133 та, 14 апрель куни 167 та, 15 апрель куни 137 та, 16 апрель куни 47 та, 17 апрель куни 56 та, 18 апрель эса 85 та ҳолат аниқланганди.

Соғлиқни сақлаш вазирлиги 20 апрель куни мамлакат бўйича 36 нафар бемор коронавирус инфекциясидан бутунлай соғайгани ҳақида хабар берди. Ўзбекистон бўйича коронавирусдан тузалганларнинг умумий сони 261 кишига етди. 

Ўзбекистонда 15 мартдан буён коронавирусга чалинган беморларнинг беш нафари вафот этди.

Хорижда 73 ўзбекистонликда коронавирус аниқланган (энг кўпи — 42 нафари — Россияда), уларнинг тўрт нафари вафот этган.

Ўзбекистон бўйича асосий маълумотлар?

Шавкат Мирзиёев ва Европа кенгаши президенти коронавирусга қарши кураш масаласини муҳокама қилди. Шарль Мишель Европа Иттифоқи ушбу глобал хатарга қарши курашишда Ўзбекистонга зарур ёрдам кўрсатишга тайёрлигини билдирди.

Тошкентда ҳарбий хизматчилар дезинфекция ишлари бўйича ўқув машғулоти ўтказди. Ўзбекистон Президентининг махсус топшириғига биноан, 20 апрелдан 20 май кунига қадар мамлакат ҳудуди бўйлаб махсус тактик ўқув машғулотлари ўтказилади.

Тошкент вилояти асаларичилари уюшмаси асаларичиларнинг шахсий автомобилда ҳаракатланиши учун рухсат олишда ҳукуматдан ёрдам сўрамоқда — «Агар биз ҳозир ҳаракатланмасак, асаларилар умуман йўқ бўлиши мумкин».

Ўзбекистонда пандемия сабаб фойдаланилмаётган ерлар аҳолига мева-сабзавот етиштириш учун берилиши кутилмоқда. Бундан кўзланган мақсад ҳозирги глобал инқироз ва коронавирус пандемияси шароитида аҳоли бандлиги ва даромадини таъминлаш, аҳолининг озиқ-овқатга бўлган талабини тўлиқ таъминлаш ва экспортни амалга ошириш ҳисобланади.

Тошкентда махсус стикерларни ноқонуний қўлга киритган шахсларга нисбатан жиноий иш қўзғатилди. Пойтахтда 9 та МЧЖнинг мансабдор шахслари жами 18 та ҳолатда стикерларни ноқонуний қўлга киритгани аниқланган.

Мудофаа вазирлиги Ўзбекистонда коронавирус эпидемияси билан боғлиқ ҳолат яхши томонга ўзгаргандан сўнг ҳарбий хизматга чақирув ишлари давом эттирилишини маълум қилди. Бир ойлик хизматга пулини тўлаб қўйган фуқароларнинг пуллари қайтариб берилмайди. Ҳарбий хизмат учун ўтказилган тиббий кўрик натижалари 3 ойгача ўз кучида қолади. Ҳарбий хизматни ўташ ёшига етган фуқаролар карантиндан сўнг хизматга чақирилиши мумкин.

Шунингдек, Мудофаа вазирлиги карантинда бўлганлар ҳарбий хизматга қабул қилинадими, хизматни ўтаганлар уйга қайта оладими деган саволларга жавоб берди.

Ўзбекистонда карантин қоидаларига амал қилмаганлар сони 83 мингдан ошди. Қоидабузарлар сони бўйича пойтахт етакчилик қилмоқда. 20 кун ичида карантин қоидаларини бузган 918 киши судланди, 421 киши 246 миллион сўм жаримага тортилди.

Жиззахда карантин вақтида танишлари билан туғилган кунини нишонлаган яна бир шахс жавобгарликка тортилди. Аввалроқ Жиззахда карантин вақтида туғилган кунини танишлари билан нишонлаган шахс жазолангани ҳақида хабар берилганди. Сирдарёда ҳам карантин қоидаларини бузиб, уйида маишат уюштирган аёл жаримага тортилгани маълум қилинганди.

Жаҳонда нима гап?

«Ромир» ва Gallup International ҳолдинги ўтказган сўровномалар натижасидан дунёда коронавирусни енгиш учун чекловларга сабр қилишга тайёр одамлар сони ошаётгани маълум бўлган.

Саудия Арабистонида дунё мусулмонларига таровеҳ намозини уйда ўқиш тавсия қилинди. Мурожаатда оммавий йиғилишлардан узоқроқ бўлиш, яъни ифторликларни ўз хонадонларида, оилавий тарзда уйдан чиқмай ўтказиш сўралган.

Бугунги кун олимлари янги турдаги коронавирусдек вирусни сунъий тарзда яратиш учун етарли билимга эга эмас. Бу ҳақда Ухань вирусология институти раҳбари Юань Чжимин маълум қилди.

Мен ҳеч қачон инсониятнинг ҳозир бу каби вирусни ярата оладиган салоҳиятга етганига ишонмайман. коронавируснинг лаборатория шароитида яратилгани юзасидан ҳеч қандай далил ва асос йўқ.

Юань Чжимин, Ухань вирусология институти раҳбари

Аввалроқ Пентагон коронавирус табиий усулда келиб чиққанига етарли далиллар борлигини билдирганди. ХХР Ташқи ишлар вазирлиги вакили Чжао Лицзян ушбу тахминларга жавобан Жаҳон соғлиқни сақлаш ташкилоти коронавируснинг сунъий синтез оқибатида пайдо бўлганлигини тасдиқламаганини қайд этиб, ташкилот экспертлари инфекциянинг одам томонидан лаборатор шароитда яратилгани юзасидан далиллар топмаганини маълум қилганди.

Россия коронавирусни текширувчи тест тизимини танқид қилган Беларусь президентига жавоб қайтарди. Аввалроқ Александр Лукашенко коронавирусни текширувчи Россия тестларининг самарадорлигига шубҳа билан қараганди.

Москвада антитана плазмаси учун донорларга тўланадиган пул миқдори белгиланди. COVREC’нинг ҳар 150 миллилитр плазмаси 1250 рубль (тахминан 170 минг 520 сўм), яъни 600 миллилитр учун 5 минг рубль (тахминан 682 минг сўм) тўланади.

Нью-Йорк штатида коронавирус сабаб фуқароларнинг онлайн тўй қилишига рухсат берилди. Никоҳ қайд этилгани ҳақидаги гувоҳномани энди интернет орқали олиш, рўйхатдан эса видеоконференцалоқа форматида ўтиш мумкин.

«Эпидемия» фильми режиссёри Стивен Содерберг АҚШ киносаноатини қайта тиклашга киришади. Стивен Содерберг 2011 йилда ўта хавфли Хитой вируси ҳақидаги «Эпидемия» фильмини суратга олган. 2020 йилнинг март ойи охирида ушбу фильм бутун дунёдаги барча платформаларда энг кўп томоша қилинган фильм бўлди.

Италиянинг Ferrari автомобилсозлик компанияси коронавирусга қарши кураш доирасида сунъий нафас олдириш аппаратлари учун клапан ва маҳкамлагичларни ишлаб чиқаришни бошлади. Термопластик таркибий қисмларни ишлаб чиқариш Маранеллодаги заводнинг автомобиль прототипларини яратиш билан шуғулланувчи бўлими томонидан йўлга қўйилди. Таъкидланишича, тайёр бўлган маҳсулотлар фавқулодда вазиятларни бартараф этиш идорасига, у ердан шифохоналарга юборилади.

Норвегияда коронавирус сабаб ёпилган боғчалар яна очилмоқда. Таъкидланишича, мактабгача таълим муассасаларининг очилишига қарамай, кўплаб ота-оналар бу каби вазиятда фарзандлари уйда қолишини маъқул кўрмоқда.

Ҳиндистонда пандемия даврида туғилган чақалоққа Санитайзер деб исм қўйилди. Ота-она ўғилларига қўйилган исмни шифокорлар табассум билан қарши олганини билдирган.