Смартфонларнинг асосий бозори қайта тикланмоқда. Хитойда iPhone’лар савдоси бир ой ичида 416 фоизга ўсди

Хитойда Apple компаниясининг iPhone қурилмалари савдоси март ойида февралга қараганда 416 фоизга ошиб, тахминан 2,5 миллион донага етди, деб хабар беради IXBT

Хитой Саноат ва ахборот технологиялари вазирлигининг маълум қилишича, март ойида смартфонларнинг жами савдоси 241 фоизга ўсиб, 21,8 миллион донани ташкил этган. Бу ўтган йилнинг шу даврига нисбатан 23 фоизга паст. Бироқ натижалар коронавирус пандемияси тарқалгани ҳисобга олинса, жуда яхши ҳисобланади. Смартфонларнинг асосий бозори қайта тикланмоқда.

Март ойида Хитойда 5G алоқа тармоғини қўллаб-қувватлайдиган 6,2 миллион дона смартфон сотилган бўлиб, бу февраль ойига нисбатан 161 фозига кўп демакдир. 5G смартфонлар етказиб берилган смартфонларнинг 27 фоизини ташкил этмоқда. Февраль ойида Хитой бозорининг 92 фоизи Android телефонлар ҳисобига тўғри келган бўлса, мартда ушбу кўрсаткич 88 фоизни ташкил этди.

Таҳлилчиларнинг таъкидлашича, Apple қурилмаларини етказиб бериш занжири «нормаллашган».