Путин Россияда коронавирус ҳали ўз чўққисига етмаганини маълум қилди

Россияда, жумладан, Москвада коронавирус эпидемияси ҳали ўз чўққисига чиққани йўқ. Бу ҳақда мамлакатдаги санитар-эпидемиологик вазият ҳақида мажлис ўтказган мамлакат президенти Владимир Путин маълум қилган, деб ёзмоқда «РБК».

Путиннинг сўзларига кўра бошқа давлатлар билан таққослаганда Россияда инфекция борасидаги вазият нисбатан қониқарли ҳолатда. У ушбу натижага Россия соғлиқни сақлаш тизимининг тўғри ташкил қилингани, тиббиёт ходимларининг яхши тайёргарлик кўргани сабаб эришилганини қайд этди.

Россия давлат раҳбари мамлакатда муаммолар етарли экани бу мақтанадиган жиҳат эмаслиги, хотиржамликка берилмаслик кераклигини таъкидлади.

«Мутахассисларимизнинг айтишича эпидемия ҳали Россияда, жумладан, Москвада ҳам ҳали ўз чўққисига чиққани йўқ», — деди у.

Владимир Путин пойтахт маъмурияти томонидан амалга оширилган ишлар ўзини оқлаганини айтди. Энг муҳими, техник ва маъмурий масалалар охиригача ҳал этилиши лозимлиги, фуқароларда муаммолар бўлмаслиги зарурлигини қўшимча қилди.Бош вазир ўринбосари Татьяна Голикова Россияда касалланишнинг ўртача кўрсаткичи 100 минг нафар аҳолига 12,5 кишини ташкил этаётганини маълум қилди. Шунингдек, Москва шаҳри, Подмосковье, Коми, Мурманск вилоятлари ҳамда Санкт-Петербург бу борада етакчи эканини билдирди. Голикова берган маълумотларга асосан Россияда касалланганлар сони 18 минг нафардан ошган, 148 нафар киши эса COVID-19 оқибатида вафот этган.

Москва маъмурияти томонидан аҳолининг шаҳар бўйлаб шахсий ва жамоат транспортида ҳаракатланиши учун рақамли рухсатномалар тизими жорий қилинган. Ҳужжатлар 13 апрелдан расмийлаштирила бошланган, рухсатнома олиш 15 апрелдан мажбурий деб эълон қилинди.