Ўзбекистонда жорий этилган карантин даврида Президент виртуал қабулхонаси ҳамда Халқ қабулхоналарига телефон алоқаси, интернет орқали мурожаат қилиш имкони яратилган, келиб тушаётган мурожаатлар ижроси қатъий назоратга олинган. Бу ҳақда «Дарё»га Тошкент шаҳар Халқ қабулхонаси маълум қилди.
Хабар берилишича, виртуал қабулхонанинг қўнғироқларни қабул қилиш марказида санитария-гигиена қоидаларига қатъий риоя қилган ҳолда ҳафтанинг барча кунида тун-у-кун узлуксиз иш йўлга қўйилган бўлиб, фуқароларнинг мурожаатлари қабул қилинмоқда.
Маълум қилинишича, 2020 йилнинг 16 мартидан 5 апрель кунига қадар виртуал қабулхонага келиб тушган 69514 та мурожаат ўз вақтида кўриб чиқилган. Уларнинг 44759 таси ижобий ҳал қилинган, 11427 та мурожаат қўшимча ўрганиш учун масъулларга қайтарилган, 13328 та мурожаатни ўрганиш бўйича қўшимча муддат белгиланган. Ҳар куни ўртача 2238 та мурожаат ҳал қилинмоқда.
Президентнинг Тошкент шаҳридаги Халқ қабулхонасида муарожаатчилар учун карантин шароитида муаммо ва таклифларини етказиш учун шарт-шароит яратилган. Халқ қабулхоналари билан маҳалла фуқаролар йиғинлари ўртасида ўрнатилган доимий онлайн мулоқот ҳудудлардаги мавжуд реал ҳолатни мунтазам мониторинг қилиб бориш, мурожаатларни тезкор кўриб чиқиш ва ҳал қилиш учун масъулларни белгилаш ҳамда ижросини назорат қилиш имконини бермоқда.
Бундан ташқари, аҳоли уйдан чиқмаган ҳолда телефон орқали ҳам Халқ қабулхоналарига мурожаат қилиши мумкин. Фуқароларга янада қулайлик яратиш учун қабулхонага келган мурожаатчилар билан видеоконференсалоқа тизими воситасида мулоқот қилиш, Халқ қабулхоналари олдида ўрнатилган махсус қутиларга мурожаатни қолдириш имкониятлари ҳам яратилди. Қабулхонага келган ҳар бир мурожаатчи тиббиёт ходимлари томонидан зарур текширувлардан ўтказиб, зарур дезинфекция ишлари олиб борилмоқда.
Фуқаролардан келиб тушаётган талаб ва таклифлар асосида секторлар раҳбарлари ҳамда бошқа идора ва ташкилотларни жалб этган ҳолда озиқ-овқат маҳсулотлари, дори-дармон воситалари савдоси маҳаллалар кесимида йўлга қўйилди. Юнусобод туманида ҳар куни юк машиналарига аҳоли эҳтиёжи учун зарур озиқ-овқат маҳсулотлари жамланиб, белгиланган график асосида тумандаги 63 та маҳаллада кўчма бозорлар ташкил қилинмоқда.
Аҳолининг ижтимоий ҳимояга муҳтож қатлами — боқувчисини йўқотганлар, ёлғиз кексалар, ногиронлиги бор шахслар, доимий иш билан банд бўлмаган инсонларга тиббий-ижтимоий, моддий ёрдам кўрсатилмоқда. Бундан ташқари, Халқ қабулхоналарига муҳтож инсонлар ва оилаларга ёрдам кўрсатиш истагини билдириб, мурожаат қилаётган кўплаб фуқаро ва тадбиркорларнинг ҳомийлик ёрдамлари Маҳалла ва оилани қўллаб-қувватлаш вазирлигининг ҳудудий бошқармалари қошида ташкил этилган ҳомийлик хайрияларини мувофиқлаштириш марказларига йўналтирилмоқда.
Электр энергияси, газ, суюлтирилган газ, сув, иссиқлик таъминоти, алоқа хизматлари юзасидан йўлланаётган мурожаатлар зудлик билан кўриб чиқилмоқда ва аниқланган муаммо ҳамда камчиликларни бартараф этиш чоралари кўрилмоқда.
Қайд этилишича, давлат раҳбари топшириғига биноан Фавқулодда вазиятлар вазирлиги ҳузурида ташкил этилган ёшлар мурожаатларини қабул қилиш маркази Президент виртуал қабулхонасига интеграция қилинган. 1250 қисқа рақами орқали бугунги кунга қадар келиб тушган 600 га яқин мурожаат юзасидан масъул ижрочилар белгиланиб, уларнинг ижроси назорат қилиб борилмоқда. Мурожаатлар таҳлили ёшларни асосан бандлик, ўқишга кириш, ўқишни кўчириш, қайта тиклаш, ер майдони ажратиш, кредит олиш каби масалалар ўйлантираётганини кўрсатмоқда. Айни пайтгача 1250 қисқа рақами орқали келиб тушган мурожаатларнинг ярмидан кўпи бўйича кўтарилган муаммолар амалда ҳал қилинди.
Маълумот учун, Ўзбекистонда 14 апрель соат 10:00 ҳолатига кўра, коронавирус инфекциясини юқтириб олган фуқаролар сони 1054 нафарга етди. Касалликдан 89 киши тузалди, ўрт киши касаллик оқибатида вафот этди.
Изоҳ (0)