Карантиндаги хайрия шов-шувлари: Етказилган озиқ-овқатнинг сифати ва миқдоридан нолиганлар ношукурликда айбланди

Маълумки, Ўзбекистонда 15 март куни коронавирус инфекциясига чалиниш ҳолати илк маротаба қайд этилди ва шундан буён 66 киши соғайишга улгурди, айни пайтда 4 киши вафот этди. Бугунга келиб Ўзбекистонда инфекцияга чалинганларнинг умумий сони 833 нафарни ташкил этмоқда.

Коронавирус тарқалишининг олдини олиш мақсадида кўпгина савдо ва маиший хизмат кўрсатиш муассасалари, бир нечта шаҳар ва туманларга кириш ва чиқиш ёпиб қўйилди, кўчада тиббий ниқобсиз юриш тақиқланди ва автомашиналар ҳаракати тартибга солинди.

Бугунги кунда аҳоли томонидан ушбу Call-марказга жами 18 705 дан ортиқ мурожаат келиб тушган. Тошкент шаҳри мисолида кўрадиган бўлсак, бугунги кунга келиб жами 24 793 хонадонга 3 миллиард 191 миллион 20 минг сўмлик бирламчи озиқ-овқат маҳсулотлари етказиб берилди. Call-марказ ва етказиб бериш хизмати билан кўнгилли волонтёрлар жамоаси шуғулланмоқда; улар орасида хонанда Севара Назархон ҳам бор.

Бундан ташқари, кўплаб тадбиркорлар, давлат органлари ходимлари ҳам коронавирусга қарши кураш мақсадида ҳамда кам таъминланган оилаларга кўмак бериш учун хайрия ишларини олиб бормоқда.

Жумладан, яқинда ижтимоий тармоқларда ёш йигитнинг тарқатилаётган озиқ-овқат маҳсулотлари ва етказиб берувчиларга қаратилган кинояли сўзлари айланди.

Кейинчалик туппа-тузук кийиниб олган бу йигит ҳозир Туркияда экани маълум бўлди. Унинг ўзи эса кечирим сўраб яна бир видео чиқарди.

Facebook’да хайрия сифатида тарқатилган озиқ-овқат маҳсулотларини тарозига тортиб чиқиб, «етмай қолган» 50-60 граммни «посбонлар еган» дея видеога олиб тарқатган яна бир эркак кишининг видеоси тарқалди.

1197 орқали берилган хайрия маҳсулотларини қайтариб олиб келган сурхондарёлик аёл видеосига ҳам кўзингиз тушган бўлса керак. «Ҳоким ҳам чиқиб ишла, деб айтяпти» дейди у кўзида ёш билан. Видео якунида тўғри олиб борилган тушунтириш ишларидан кейин аёлнинг маҳсулотларни қайтариб олиб кетганини кўриш мумкин.

Нурафшонлик фуқаро чиқарган видеоси ва айтган гаплари ижтимоий тармоқ фойдаланувчиларини ҳақиқатан ҳам ларзага келтирди. Воқеага алоқаси бўлмаган бир Facebook фойдаланувчиси жойлаган видео салкам 2 минг изоҳ тўплади ва 400 мартага яқин улашилди. Изоҳ қолдирганларнинг аксарияти аёлни ношукурликда айблаган бўлса, баъзилар аёлни қўллаб-қувватлади ҳам.

Ижтимоий тармоқларда тарқалаётган видеолар фақат норозиликлардан иборат эмас. Хайрия ишларидан миннатдор бўлаётган фуқаролар ҳам бор. «1197 га телефон қилгандик, олиб келиб беришди. Ишларининг ривожини берсин» дейилади бир видеода.

«Худди шу ёғларни (илгари тарқалган видеолардан бири назарда тутиляпти) ишлатиб бўлмайди деб айтишди, сифатли ёғ-ку» дейди яна бир фуқаро.

Ижтимоий тармоқларда тарқалаётган хайрия тадбирлари доирасида етказиб берилаётган маҳсулотларни танқид қилганларга жавоб видеолар ҳам йўлланди. Мана шундай видеолардан бири. «Сендан ҳам муҳтожлар бордир, кимдир ўшани кўзига суртиб ер», дейди видеони тасвирга олган аёл.

«Мусофир бўлиб бир йил ишланг, кейин қотган нонни ҳам пешонангизга суртиб ейдиган бўласиз», дея мурожаат йўллаган ёш йигитнинг сўзлари ҳам кўпчиликни таъсирлантирди.

У мурожаатини маҳсулотларни тарозига тортиб кўраётган кишига йўллаган. Бу видео Facebook’да кўпгина муҳокамаларни келтириб чиқарди.

Блогер Аброр Мухтор Алий хайрия маҳсулотларини ёмонлаб чиқаётганларга видеомурожаат йўллади.

Фуқароларни оқилона ҳаракат қилишга чорлаб, Call-марказ ходимлари ҳамда етказиб бериш хизматини кўрсатаётган волонтёрлар жамоаси фаолиятига омад тилаймиз.