Мудофаа ва Фавқулодда вазиятлар вазирликлари Хоразм вилояти ҳокимлиги билан ҳамкорликда COVID-19 коронавирус касаллигига қарши 1 апрель куни ўтказилган махсус тактик ўқуви давомида вилоятнинг 160 минг квадрат метр майдонида дезинфекция ишларини олиб борди. Бу ҳақда «Дарё»га Шимоли-ғарбий ҳарбий округ матбуот хизмати хабар берди.
Қайд этилишича, Урганч ва Хива шаҳри, Гурлан, Янгиариқ ва бошқа туманларда мутахассислар олдига қўйилган вазифаларни сифатли адо этиш мақсадида шахсий ҳимоя костюмлари, дезинфекцияловчи эритмаларни пуркаш учун ускуналар ва махсус техникалардан кенг фойдаланилди.
Коронавирус пандемияси тарқалишининг олдини олиш ҳамда одамларни уйдан чиқмасликка чақирувчи эшиттиришни узатиш учун жанговар техника базасидаги овоз эшиттириш станцияси қўлланилди.
Кўчалар, хиёбонлар, бозорлар ҳамда аҳоли гавжум бўладиган бошқа ҳудудлар максимал даражада дезинфекцияланиб, одамлар ўртасида тарғибот ва ташвиқот ишлари олиб борилди. Ҳарбий хизматчилар «Биз сиз учун хизматдамиз. Сиз биз учун уйда қолинг!» шиори остида аҳоли ўртасида карантин қоидаларига амал қилишни ҳамда заруратсиз уйни тарк этмаслик тарғиботини ўтказди.
Таъкидланишича, карантинни уйда ўтказаётган аҳолининг кенг қатлами кўп қаватли уйларнинг деразаларидан ҳарбий хизматчиларни қўллаб-қувватлаб, уларга миннатдорлик билдирди.
Аввалроқ Қашқадарёда коронавирусга қарши кураш ва аҳоли яшаш манзилларини дезинфекциялаш учун махсус гуруҳлар ташкил этилгани, Тошкент шаҳри Миллий гвардиянинг махсус техникалари ёрдамида дезинфекция қилингани, Мудофаа вазирлигининг махсус мутахассислари ҳам пойтахтни дезинфекция қилгани хабар берилган эди.
Изоҳ (0)