Айни пайтда оиласи билан Россияда яшаётган хонанда Лола отаси Равшан Йўлдошевнинг вафотидан сўнг илк марта Instagram’даги саҳифасига шахсий архивидаги суратларини жойлаб, видолашув сўзларини ёзиб қолдирди.
«Менинг энг севимли, энг яхши, энг доно дадажоним! Сизни бошқа кўра олмаслигим, сизнинг овозингизни бошқа эшита олмаслигим, кўришаётганимизда сизни икки марта ўпа олмаслигим ва ниҳоят ижод борасида баҳслаша олмаслигим, навбатдаги ижодий ишимга камтарин мақтовингизни эшита олмаслигимга ишона олмаяпман.
Дадажон, биламан сиз билан ўртамиздаги ришта ҳеч қачон узилмайди. Энди бу шунчаки бутунлай бошқа энергетик даражадаги мулоқот бўлади, буни биламан ва ҳис этмоқдаман.
Вужудимда Аллоҳ менга ушбу қайғуга бардош беришим учун менга совға қилган неварангиз, сизнинг бир қисмингизнинг юракчаси урмоқда. У замонавий ўзбек эстрадаси асосчиси сифатида яратган тарихи давомида бир неча авлодни етиштирган, меҳрибон, ақлли ва истеъдодли ижодкор инсон бўлган бобоси билан албатта фахрланади. Туғилган кунингиз билан, дада! Сизни яхши кўраман, менинг қаҳрамоним!», — деб ёзди Лола.
Шунингдек, марҳум Равшан Йўлдошевнинг яна бир қизи Асал Йўлдошева ҳам Instagram’даги саҳифасига отаси билан тушган суратини жойлаб, уни туғилган куни билан табриклади.
Аввалроқ Лоланинг АҚШда яшовчи синглиси Анора ҳам отасини хотирлаган эди.
Эслатиб ўтамиз, Шаҳзоданинг собиқ турмуш ўртоғи, хонанда Лоланинг отаси, «Тарона Рекордс» компанияси асосчиси Равшан Йўлдошев 30 март куни юрак хуружидан вафот этди. Марҳум ҳаётининг сўнгги дақиқаларида унинг ёнида собиқ рафиқаси, хонанда Шаҳзода бўлган.
Мавзуга доир:
- «Тарона Рекордс» асосчиси Равшан Йўлдошевнинг коронавирусдан вафот этгани тўғрисидаги гап-сўзлар рад этилди
- Собиқ «Сетора» гуруҳи хонандалари Равшан Йўлдошев ҳақида: Сизни қучоқлаб, ҳаммаси учун раҳмат айтишга улгурмадик
- Райҳон Равшан Йўлдошев унинг қўшиқларини «Ўзбегим таронаси» радиосида бепул «айлантириб бергани» ҳақида сўзлаб берди
Изоҳ (0)