Тошкент ва Нукус шаҳарларида, шунингдек, вилоятлар марказларида 2020 йил 30 март кунидан 20 апрелга қадар транспорт воситалари ҳаракатланишига фақат махсус рухсатнома (стикер)лар асосида рухсат берилиши ҳақидаги қарорнинг ижросини таъминлаш мақсадида 31 мартдан бошлаб ушбу қарорни бузаётган ҳайдовчиларни аниқлаш бўйича тадбирлар ўтказилади. Бу ҳақда Ички ишлар вазирлиги Йўл ҳаракати хавфсизлиги бош бошқармаси «Дарё»га маълум қилди.
Бош бошқарма томонидан қайд этилишича, Маъмурий жавобгарлик тўғрисидаги кодексининг 54 моддаси (Эпидемияларга қарши кураш қоидаларини бузиш)га биноан, ҳуқуқбузарларга нисбатан базавий ҳисоблаш миқдорининг 20 бараваридан 30 бараваригача (фуқароларга) ва 30 бараваридан 50 бараваригача (мансабдор шахсларга) миқдорда жарима солиниши мумкин.
Маълум қилинишича, махсус рухсатномани қалбакилаштирганлик учун жиноий жавобгарлик белгиланган.
Эслатиб ўтамиз, шахсий автомобилда ҳаракатланиш учун махсус рухсатнома Давлат хизматлари марказлари томонидан соддалаштирилган тартибда, онлайн режимда расмийлаштирилмоқда. Давлат хизматлари агентлиги томонидан маълум қилинишича, махсус рухсатнома олиш учун BMW Х7, Mercedes, Lexus, Hyundai, Captiva, Malibu-2, Tracker каби машиналар эгаларидан «курьерликни амалга ошириш» мақсадида аризалар келиб тушмоқда.
Аввалроқ Андижон вилоятида махсус рухсатномани қалбакилаштирган шахслар ушланган эди.
Изоҳ (0)