Юнусобод метро линияси вақтинча ёпилди, аммо йўловчилар бу ҳақда олдиндан огоҳлантирилмади

Бугун, 19 март куни Тошкент метрополитенининг Юнусобод линиясидаги янги станцияларни ишга туширишга тайёргарлик кўриш мақсадида ва техник ишлар олиб борилиши муносабати билан мазкур йўналиш вақтинча ёпилди, деб хабар бермоқда Транспорт вазирлиги ахборот хизмати.

Бу ҳақда йўловчилар мурожаатларига таяниб «Ко дну» Telegram-канали соат 09:04 да маълум қилган. Вазирлик хабари эса бундан қарийб икки соат ўтиб (10:55) эълон қилинган.

Вазирлик вақтинчалик ноқулайликлар учун узр сўраб, ушбу линия қачон очилиши ҳақида яқин орада маълумот беришини таъкидлаган.

«Ко дну» канали эса «Йўловчилар олдиндан огоҳлантирилдими? Дублёр автобус қўйиш ҳақида ўйлаб кўрилмайдими? Метро қачон очилиши айтилмайдими?», деган саволларни ўртага ташлаган.

Ўзбекистон темир йўллари матбуот хизмати 12:02 да ҳаракат қайта тикланганини маълум қилган ва бундай хабарларни ёритувчи блоггер ва журналистлардан янги объектларини қуришда техник томон билан боғлиқ бундай режалаштирилмаган чоралар кўрилаётганини тўғри тушунишларини ва аҳоли ўртасида салбий талқинларни тарқатмасликни сўраган.