Шавкат Мирзиёев томонидан 17 март куни имзоланган қонун билан Маъмурий жавобгарлик тўғрисидаги кодекс жарима солиш тўғрисидаги қарорни ижро этишнинг соддалаштирилган тартибини назарда тутувчи модда билан тўлдирилди.
«Ҳуқуқий ахборот» каналининг хабар беришича, унга кўра, жарималарни ўз вақтида тўлаганларга 30 фоизлик чегирма тақдим этилади. Ҳуқуқбузар унга жарима солиш тўғрисидаги қарор топширилган кундан бошлаб 15 кун ичида жарима миқдорининг 70 фоизини ихтиёрий равишда тўлаган тақдирда, у жариманинг қолган қисмини тўлашдан озод қилинади.
Соддалаштирилган тартиб қуйидаги ҳолларда қўлланилмайди:
- маъмурий ҳуқуқбузарлик содир этганлик учун суд томонидан жарима солинганда;
- жарима солиш тўғрисидаги қарор устидан шикоят қилинганда ёки протест билдирилганда;
- худди шундай ҳуқуқбузарлик маъмурий жазо чораси қўлланилганидан кейин 1 йил давомида такрор содир этилганда.
Аввалроқ Шавкат Мирзиёев тўй ўтказиш тартибини бузганлик учун жарима солиш тўғрисидаги қонунни имзолагани хабар берилган эди.
Изоҳ (0)