Бутун дунёда тарқалган COVID-19 коронавируси инсон организмига тушганда ўпкага ўтишидан аввал, томоқда тўрт кунгача сақланиб туриши, шу пайтда йўтал ва томоқ оғриқ бошланиши, агар ушбу даврда кўп сув ичилса, туз ва сиркали сувда томоқ чайқалса, вирус йўқолиши ҳақида ижтимоий тармоқларда тарқалган хабарлар ҳақиқатдан йироқ. Бу ҳақда Санитария-эпидемиологик осойишталик агентлиги «Дарё»га маълум қилди.
«Ижтимоий тармоқларда тарқалган ‘Коронавирус ўпкага ўтишидан аввал, томоқда 4 кунгача сақланиб туради, шу пайтда йўтал ва томоқ оғриқ бошланади. Агар шу даврда кўп сув ичилса, туз ва уксусли сувда томоқ чайқалса, вирус йўқолади’ мазмунида тарқалаётган хабарлар ҳақиқатга тўғри келмайди.
Коронавирус инфекциясига хос клиник белгилардан бири — қуруқ йўтал. Оғиз бўшлиғини доимо хўллаб туриш организм учун жуда фойдали, чунки оғиз бўшлиғи шиллиқ қаватдан иборат бўлиб, суюқлик ичиши ҳисобига доимо нам ҳолатда бўлиши, оғиз бўшлиғи шиллиқ қаватининг ташқи муҳитдан таъсир қилаётган микроорганизмлардан, шу жумладан коронавирусдан ҳимоя қиладиган қобиқ сифатида таъсир кўрсатади.
Туз ва сиркали сув юқорида айтиб ўтилганидек, оғиз шиллиқ қавати бутунлигининг бузилишига ва оқибатда турли хил касалликларни оғиз орқали юқишига олиб келади. Шуни унутмаслик керакки, аҳоли орасида ваҳима чиқаришга қаратилган маълумотлар, материаллар, фейк хабарлар ва умуман, ишончсиз ахборотни ҳар қандай шаклда тарқатиш амалдаги қонунчиликка мувофиқ жиноий жавобгарликка сабаб бўлиши мумкин», — дейилади Агентлик хабарида.
Сўнгги маълумотларга кўра, Ўзбекистонда коронавирусга чалинганлар сони саккиз кишига етган — уларнинг олти нафари бир хонадонда бўлган фуқаролардир, қолган икки нафари Истанбул ва Лондондан келган фуқаролар. Соғлиқни сақлаш вазири Алишер Шодмонов ҳозирда бутун Ўзбекистон бўйича 6 мингдан ортиқ фуқаро карантинга олинганини маълум қилди.
Изоҳ (0)