Икки мамлакат бош вазирлари Коҳир Расулзода ва Абдулла Арипов раис ҳисобланувчи Тожикистон ва Ўзбекистон ўртасидаги савдо-иқтисодий ҳамкорлик бўйича ҳукуматлараро комиссиянинг навбатдаги мажлиси апрель ойининг иккинчи ярмида Тожикистоннинг Гулистон шаҳрида шаҳрида бўлиб ўтади, деб хабар берди Asia-Plus.
Қайд этилишича, ўтган йил охирида бўлиб ўтиши режалаштирилган комиссия мажлиси Тошкент ва Душанбе ўртасида ҳал этилмаган баҳсли масалалар мавжуд эмаслиги, икки давлатнинг барча йўналиш ва соҳалардаги муносабатлари жадал ривожлангани сабабли қолдирилган эди.
Бўлиб ўтиши кутилаётган мажлисда, асосан, Тожикистон ва Ўзбекистон ўртасидаги савдо-иқтисодий, гуманитар, маданий, илмий-техникавий ҳамкорликни ривожлантириш масалалари муҳокама қилинади.
Тожикистоннинг Ўзбекистонга электр энергияси етказиб бериш ҳажми, Ўзбекистондан Тожикистонга табиий газ ва улар учун жорий йил учун нархлар ҳам ушбу мажлисда келишиб олинади.
2019 йилда Тожикистон Ўзбекистонга 1 миллиард 425,1 миллион кВт/ соат электр энергия етказиб берган. Бир киловатт электр энергияси икки сентга баҳоланган. Тожикистондан Ўзбекистонга етказиб берилган электр энергиясининг умумий суммаси 28,5 миллион долларни ташкил этган.
2019 йилда Тожикистон Ўзбекистондан 17,7 миллион долларлик 140 миллион кубометр табиий газ сотиб олган.
Ўзбекистон газининг минг кубометри Тожикистонга 120 долларга тушган.
Изоҳ (0)