«Humo пайдо бўлгач, Uzcard ҳам ҳаракатга тушиб қолди». Монополияга қарши курашиш қўмитаси тўлов тизимлари монополияси ҳақида гапирди

Яқинда ташкил этилган Humo тўлов тизимини монопол ташкилот дейишга ҳали эрта. Мазкур янги тизим айни пайтда ривожланиш жараёнида. Унинг бозордаги улуши янги технологияларни олиб киргани эвазига юқорилаб боряпти. Бу ҳақда 6 март, жума куни, Монополияга қарши курашиш қўмитаси мутасаддилари иштирокида ўтказилган матбуот анжуманида таъкидланди, дея хабар бермоқда «Дарё» мухбири Миролим Исажонов.

«Humo’нинг рақобатчиси ҳисобланган Uzcard (Ягона умумреспублика процессинг маркази) — ҳозирча монопол ташкилот. Мазкур тизимнинг улуши ҳамон бозорда катта. Шу боис у ҳалигача ўз мавқеини сақлаб турибди. Humo яқинда ташкил этилди ва уни монопол ташкилот дейишга ҳозирча эрта. Ушбу янги тизим аста-секин ривожланяпти ва банклар ушбу пластик карталардан фойдаланишни бошлади.

Humo янги технологияларни олиб киргани боис унинг улуши ортиб бормоқда. Uzcard’да амалга ошириб бўлмайдиган хизматларни Humo’да қилиш мумкин. Humo’нинг имкониятлари, хизмат турларини кўриб, Uzcard ҳам ҳаракатга тушиб қолди. Мана, сизга рақобатнинг таъсири. Балки, рақобат муҳити шу тарзда давом этса ва ўз мавқеини суиистеъмол қилиш имконияти қолмаганидан сўнг Uzcard’ни монопол ташкилотлар рўйхатидан чиқариб юборишимиз ҳам мумкин», — деди қўмита раиси Нажмиддин Шарипов.