АҚШ президенти Дональд Трамп «Толибон» ҳаракати етакчиси мулла Абдулла Ғани Бародарни ички афғон музокараларида иштирок этишга чақирди. Бу ҳақда Оқ уйга таяниб, «РИА Новости» хабар берди.
«Президент Трамп 29 февраль куни АҚШ ва ‘Толибон’ ҳаракати ўртасида имзоланган тарихий битим сабаб юзага келган имконият доирасида зўравонликни камайтиришни давом этиш зарурлигини қайд этди. Шунингдек, у 40 йилдан ошиқроқ вақтдан бери давом этаётган урушни тўхтатиш учун ‘Толибон’ни Афғонистон вакиллари ва бошқа афғонлар билан ўтказиладиган ички музокараларда иштирок этишга чақирди», — дейилади хабарда.
Таъкидланишича, Дональд Трамп тинчлик учун ҳаракат қилаётган афғон халқини қўллаб-қувватлашни давом этади.
Эслатиб ўтамиз, 29 февраль, шанба куни, Қатар пойтахти Доҳада АҚШнинг Афғонистон бўйича махсус вакили Залмай Ҳалилзод ҳамда «Толибон» етакчисининг ўринбосари, ҳаракатнинг Қатардаги офиси раҳбари мулла Абдулла Ғани Бародар келишув битимини имзолаган эди. Ўзбекистон ташқи ишлар вазири Абдулазиз Комилов бошчилигидаги делегация ҳам ушбу тинчлик музокараларида иштирок этган. «Толибон» Ўзбекистоннинг Афғонистон можаросини ҳал этишдаги саъй-ҳаракатларини эътироф этган эди.
Изоҳ (0)